सामग्री खोज्नुहोस्

काठमाडौं, ३० वैशाख ।

साताको दोस्रो दिन मंगलबार नेपाल स्टक एक्सचेञ्ज (नेप्से) परिसूचकमा गिरावट देखिएको छ। कारोबार सुरु भएको केही मिनेटमै नेप्से २६६९ अंकसम्म पुगेको थियो, तर त्यसपछि घट्दै १४.८७ अंकले ओरालो लागेर अन्ततः २६३४ अंकमा अडियो। बजार खुलेसँगै देखिएको प्रारम्भिक उत्साह टिक्न सकेन र दिनभर लगानीकर्ताको मनोबल कमजोर देखियो।

सेयर कारोबार रकम पनि अघिल्लो दिनको तुलनामा घटेको छ। सोमबार १० अर्ब २० करोड रुपैयाँको कारोबार भएकोमा मंगलबार ९ अर्ब ६३ करोडमा सीमित रह्यो। बजारमा ७७ कम्पनीको मूल्यमा वृद्धि भए पनि १६८ कम्पनीको शेयर घट्यो भने १ कम्पनीको मूल्य स्थिर रह्यो।

जीवन बीमा क्षेत्रले अपेक्षाकृत राम्रो प्रदर्शन गर्‍यो, जसको शेयर मूल्यमा औसत ०.९५ प्रतिशत वृद्धि देखियो। अधिकांश जीवन बीमा कम्पनीहरूले सार्वजनिक गरेको वित्तीय विवरण सकारात्मक देखिएकाले सो क्षेत्रमा हरियाली देखिएको हो। विकास बैंक तथा उत्पादन क्षेत्र क्रमशः ०.८८ र ०.३४ प्रतिशतले बढे। तर व्यापार क्षेत्र भने सबैभन्दा बढी—२.४६ प्रतिशतले घट्यो। त्यसैगरी, होटल तथा पर्यटन, फाइनान्स, हाइड्रोपावर, लगानी, माइक्रोफाइनान्स, निर्जीवन बीमा लगायत अधिकांश प्रमुख क्षेत्रहरूमा गिरावट आयो।

कम्पनीगत हिसाबले हेर्दा क्रेस्ट माइक्रोलाइफ इन्स्योरेन्स र ओम मेगाश्री फर्मास्युटिकल्सको मूल्य १० प्रतिशतले बढ्यो। त्यस्तै, जोशी हाइड्रोपावर, उन्नति सहकार्य लघुवित्त, र लुम्बिनी विकास बैंकका शेयरमा पनि उल्लेखनीय वृद्धि भएको छ। यता, नेपाल माइक्रो इन्स्योरेन्सको मूल्य सबैभन्दा धेरै ६.२२ प्रतिशतले घट्यो, जबकि बुटवल पावर र सिक्लेस हाइड्रोपावर क्रमशः ४.३१ र ४.२७ प्रतिशतले घटे।

धेरै कारोबार भएका कम्पनीहरूमा युनिभर्सल पावर, ङादी ग्रुप, नेपाल माइक्रो इन्स्योरेन्स, सानिमा माइ हाइड्रोपावर र राधि विद्युत् अगाडि रहे। बजार घटेसँगै समग्र पूँजीकरण पनि घटेर अहिले ४३ खर्ब ८१ अर्ब रुपैयाँमा झरेको छ। सेयर बजारमा देखिएको यो ओरालो लगानीकर्ताको मनोविज्ञान र सेक्टरगत प्रदर्शनले प्रभावित भएको देखिन्छ।