खोज

नेपालगञ्ज, २७ बैशाख ।
नेपालगञ्जका मुस्लिम समुदायका महिलाहरूले प्रजनन् स्वाथ्यको जानकारीसँगै सेनेटरी प्याड बनाउन सिकिरहेका छन् । ३०-३० जनाको तीनवटा समूहमा ९० जना महिलाहरूलाई तालिम सञ्चालन गएिको छ । ६० जना मुस्लिम महिलालाई प्रजनन् स्वाथ्य र ३० जनालाई सेनेटरी प्याड बनाउने तालिम दिईरहेको नेपालगञ्ज उपमहानगरपालिका १ नम्बर वडा कार्यालयले जनाएको छ ।

मुस्लिम समुदायका महिलाहरूलाई स्वस्थ जीवनशैली र सेनेटरी प्याडबाट आत्मनिर्भर बनाउने उद्देश्यले तालिम सञ्चालन गरिएको लुम्बिनी प्रदेशका सांसद मिना श्रेष्ठले जानकरी दिइन । उनले भनिन्, तालिमबाट सँधै बुका भित्र रहेका मुस्लिम महिलाहरूले तालिमबाट प्रजनन् स्वाथ्यसँगै सेनेटरी प्याड बनाउन सिक्ने अपेक्षा लिएका छौं ।’ मुस्लिम समुदायका महिलाहरूलाई आत्मनिर्भर बनाउन सेनेटरी प्याड बनाउने मात्र नभएर अन्य विषयमा पनि जानकार बनाउन आवश्यक रहेको सांसद श्रेष्ठको भनाइ छ । उनले तालिम सञ्चालन गर्नु अगाडि मुस्लिम समुदायका महिलाहरूको अपेक्षाबारे अध्ययन गरिएको बताइन् । नेपालगन्ज उपमहानगरपालिका वडा नम्बर १ का वडाअध्यक्ष प्रमोद रिजालले प्रजनन स्वास्थ्यबारे सबै जानकार हुनैपर्ने बिषय भएकाले यो विषयलाई समेटिएको बताए ।

उनले भने, ‘यो सबै समुदायका महिलाहरूको लागि आवश्यक विषय हो ,तर मुस्लिम समुदायका महिलाहरू प्राय घर बाहिर ननिस्कने हुँदा उहाँहरूलाई प्राथमितामा पारेका हौं ।’ आमामी दिनमा पनि यस्ता किसिमका तालिमहरू संचालन हुन आवश्यक रहेको उनले बताए । सेनेटरी प्याड बनाउने तालिमको सहजीकरण पुष्पा शर्माले गरिरहेकी छन् ।
१७ वर्षदेखि ३६ बर्ष उमेर समूहका महिलाहरूले सेनेटरी प्याड बनाउन सिकिरहेको उनले बताइन् । घरेलु सेनेटरी प्याडको प्रयोग गर्दा बचत हुनुका साथै वायु प्रदूषण पनि नहुने सहजकर्ता शर्माले बताइन् । उनका अनुसार एउटा प्याड कम्तीमा ४ महिनासम्म प्रयोग गर्न सकिन्छ । १ मिटर कपडाबाट ४ वटा प्याड बनाउन सकिने उनले बताइन् । लुम्बिनी प्रदेशका सांसद मिना श्रेष्ठको संयोजनमा लुम्बिनी प्रदेश सरकार स्वास्थ्य मन्त्रालयको आर्थिक सहयोग, स्वास्थ्य कार्यालय बाँकेको आयोजना र नेपालगञ्ज उपमहानगरपालिका वडा नम्बर १ को समन्वयमा तालिम संचालन भएको हो ।