खोज

काठमाडौँ ।

पछिल्लो तीन सातादेखि निरन्तर घटिरहेको सेयर बजार यो साता भने केही सुधारात्मक अवस्थामा देखिएको छ। साता दिनको कारोबारमध्ये तीन दिन नेप्से परिसूचक घटे पनि बुधबारको उल्लेखनीय वृद्धि (६२.२५ अंक) को कारण बजार समग्रमा हरियालीमै देखिएको हो।

आइतबार र सोमबार क्रमशः ३.४४ र ९.९८ अंकले घटेको बजार मंगलबार थोरै सुधार भएर बुधबार उल्लेखनीय उकालो लागेको थियो। तर, बिहीबार गभर्नर नियुक्ति प्रक्रिया अनिश्चित बनेपछि फेरि बजार १२.०४ अंकले ओरालो लागेको हो।

बजारमा कारोबार रकम भने उत्साहजनक देखिएको छ। पछिल्लो दुई दिन १० अर्बभन्दा बढी कारोबार हुँदा सातामा कुल ५५ खर्ब ६६ करोड रुपैयाँ बराबरको कारोबार भएको छ। नेप्सेले दिएको तथ्यांकअनुसार ४ लाख ९९ हजार पटकको कारोबारमा १२ करोड ६६ लाख कित्ता शेयर किनबेच भएको हो।

यो साता सरकारले आर्थिक वर्ष २०८२/८३ का लागि नीति तथा कार्यक्रम सार्वजनिक गरे पनि बजारले त्यसलाई तटस्थ रूपमा ग्रहण गरेको देखिन्छ। यद्यपि लगानीकर्ताहरूले कार्यक्रमलाई समग्रमा बजारमैत्री भने बताएका छन्।

सूचक विश्लेषणका हिसाबले १३ समूहमध्ये ११ समूहको सूचकमा वृद्धि देखिएको छ। फाइनान्स समूह सबैभन्दा बढी ६.१३ प्रतिशतले अगाडि बढ्दा हाइड्रोपावर, बीमा र बैंकिङ समूहमा पनि उल्लेख्य सुधार देखिएको छ। लगानी र अन्य समूह भने घटेका छन्।

प्राविधिक विश्लेषणअनुसार, बजार अहिले अल्पकालीन “बाउन्स” वा “रिभर्सल” चरणमा देखिएको छ। तर, रातो क्यान्डलले खरिदकर्ताको मनोबल कमजोर भएको संकेत दिँदै बजार अझै अनिश्चितताको फेजमा रहेको देखाउँछ।

हाल २६८०–२७०० अंकको अवरोध तह पार गर्न सके बजारमा बुलिस ट्रेन्ड देखिन सक्छ भने २५८०–२६०० अंकभन्दा तल झरेमा बजार पुनः बियरिस बन्ने जोखिम रहेको विश्लेषकहरूको भनाइ छ।