खोज

बाँके ।

मेरोमाइक्रोफाइनान्स लघुवित्त वित्तीय संस्था लिमिटेडले फिल्डमा कार्य गर्ने कर्मचारीहरुलाई नेतृत्व विकास तथा क्षमता अभिवृद्धि प्रशिक्षण तालिम बाँकेमा सम्पन्न गरेको छ ।संस्थाले प्रदेश लुम्बिनी, कर्णाली र सुदुरपश्चिमअन्तर्गत फिल्डमा कार्य गर्ने ४४ जना कर्मचारीहरुलाई २ दिने प्रशिक्षण दिइएको हो । तालिमको समापन समारोहमा संस्थाका प्रमुख कार्यकारी अधिकृत रामहरि दाहालले कर्मचारीहरुको सुझाब तथा गुनासो सम्बोधन गर्नु हुँदै पछिल्लो समय अर्थतन्त्र सुस्त हुँदा यसको असर बैंकिङ क्षेत्रमा परेको बताए ।

त्यस्तै, केही व्यक्ति तथा समूहले आफ्नो निहीत स्वार्थपूर्ति गर्ने उद्देश्यले बैंक तथा वित्तीय संस्थाका कर्मचारीहरुलाई तर्साउने तथा धम्क्याउने, काममा अवरोध पु¥याउने जस्ता अराजक क्रियाकलाप हुँदै आइरहेकोले कर्मचारीहरुको मनोबल बढाउन तथा तनाव ब्यवस्थापन गर्न यस तालिमले सहयोग पुग्ने विश्वास लिइएको बताए ।

सो तालिम अन्तर्राष्ट्रिय मोटिभेशनल स्पीकर सौनक भट्ट, लघुवित्त बिज्ञ सुनिल खनाल, श्रवणकुमार सपोर्ट प्रालिका प्रमुख कार्यकारी अधिकृत प्रकाश पोखरेल, संस्थाका तालिम बिभाग प्रमुख उमेश मान डंगोलले सहजीकरण गरेका थिए । मेरो माइक्रोफाइनान्स लघुवित्त वित्तीय संस्था लिमिटेडले देशभरका आफ्ना कर्मचारीहरुलाई दक्ष र कार्य सम्पादनमा सहयोग पुगोस् भनेर बैशाख महिनाभर विभिन्न स्थानमा तालिम दिइरहेको संस्थाले जनाएको छ । सो कार्यक्रममा नायव प्रमुख कार्यकारी अधिकृत नवराज दाहाल, अनुगमन तथा सुपरिवेक्षण बिभागका इश्वर आचार्य लगायतको पनि उपस्थिति रहेको थियो ।