खोज

पाल्पा, १२ बैशाख ।
रामपुर नगरपालिका न्यायीक समितिले वडामा रहेका मेलमिलाप केन्द्रमै पुगेर मेलमिलापको प्रक्रिया र मेलमिलाप केन्द्रको अनुगमन थालेको छ ।नगरपालिकामा रहेको न्यायीक समितिले नगर भित्रका वडामा रहेका मेलमिलाप केन्द्रको अनुगमन तथा अन्तरक्रिया सहित छलफल गरेको छ । समितिले वडामा पुगेर वडाबाट न्यायिक समितिमा दर्ता भएका विभिन्न मुद्दाको छलफल गरि मेलमिलाप समेत गरेको छ । दुवै पक्षलाई सहजताका लागि वडाको मेलमिलाप केन्द्रमै छलफल गरि विवादको मेलमिलाप गराईएको छ । समितिले रामपुर नगरपालिका वडा नं.८ र १० मा रहेको केन्द्रको अनुगमन गर्नुका साथै विवादको मेलमिलाप समेत गराएको हो । समितिले बुधवार वडा नं. १० मा जग्गा साँध सम्बन्धी विवादको छलफल गरि मेलमिलाप गराएको छ ।

नगरपालिकामा सुचिकृत भएका मेलमिलापकर्ताहरूले वडामा गराउने मेलमिलापको प्रक्रिया र मेलमिलाप केन्द्रको अवस्था बारे जानकारी लिन अनुगमन गरिएको रामपुर नगरपालिका न्यायीक समितिका संयोजक एवं उपप्रमुख बाल कुमारी थापाले बताईन् ।विभिन्न प्रकारका मुद्दाको समाधान र मेलमिलापलाई अझ प्रभावकारी बनाउन छलफल सहित अनुगमन गरिएको उनले बताईन् । रामपुर नगरपालिका वडा नं.८ र १० मा रहेको मेलमिलाप केन्द्रको अनुगमन गर्दै न्यायीक समित संयोजक थापाले विवादले समाजमा अशान्ती र अराजकता सिर्जना गरि दुर्घटना समेत निम्त्याउन सक्ने भन्दै दुवै पक्षको जित हुने गरि मेलमिलाप गर्न ध्यान दिनु पर्नेमा जोड दिईन् ।

थापाले मेलमिलाप गर्दा कुनै आग्रह पूर्वाग्रह नराखी कानुनले दिएको अधिकारको पूर्ण प्रयोग गरेर दुवै पक्षलाई न्यायको अनुभूति दिलाउन मेलमिलापकर्ताहरूलाई आग्रह गरिन् । उपप्रमुख थापाले पछिल्लो समय न्यायिक समितिप्रति नगरबासीको विश्वासनियता बढेको भन्दै वडाका मुद्दा वडाको मेलमिलाप केन्द्रबाटै मेलमिलाप गर्न सके सेवाग्राहीलाई सहज हुने बताउनुभयो । उनले शान्त, न्यायीक र मेलमिलाप सहितको समाज निर्माणका लागि नगरपालिका प्रतिबद्ध भएर लागेको बताईन् ।

यस्तै रामपुर नगरपालिका वडा नं.८ का अध्यक्ष दिनेश आचार्यले वडामा भएका विभिन्न प्रकारका विवादको जनप्रतिनिधिले सहजिकरण गर्दै आएको भन्दै मेलमिलाप केन्द्रलाई थप परिस्कृत गर्नुपर्ने बताए । गाँउ टोलमा भएका स–साना झगडा र विवादलाई समाधान गर्न सुचिकृत मेलमिलापकर्ता भए पनि सेवा सुविधा नभएका कारण पनि जनप्रतिनिधि स्वयमले समाधान गर्दै आएको बताए । यस्तै अनुगमन तथा छलफल गर्दै रामपुर नगरपालिका कार्यपालिका सदस्य सिमादेवि थापाले स–साना विवादले समाजिक सद्भाव विथोल्ने भन्दै यसको तत्काल सामाधान र मेलमिलाप आवश्यक रहेको उल्लेख गरे । यसैगरी न्यायीक समितका सदस्य खेमराज अधिकारीले कानुन भन्दा माथी कोही नहुने भन्दै विवादको विकल्प मेलमिलाप भन्दा अरू नभएको बताए ।

यस्तै न्यायीक समिति सदस्य तेज कुमारी नेपाली गैरेले समाजमा हुने हरेक विवादले नकारात्मक असर पु¥याउने भन्दै यस्ता विवादको न्यायोचित रूपमा मेलमिलाप हुन जरुरी रहेको बताए । यस आर्थिक वर्षमा अहिले सम्म ८९ वटा मुद्दा न्यायीक समितिमा दर्ता भएको र त्यस मध्ये ५० वटा मुद्दाको मेलमिलाप तथा समाधान गरिएको न्यायीक समिति सचिवालय सचिव पार्वति परियारले जानकारी दिनुभयो । विवादलाई मेलमिलापको माध्यमबाट न्यायोचित रूपमा समाधान गर्नका लागि नगरपालिका भित्र ३७ जना सुचिकृत मेलमिलापकर्ता रहेका छन् । साथै नगरपालिकाले मेलमिलापलाई प्रभावकारी बनाउन नगरभित्रका १० वटै वडाका मेलमिलापकर्ताहरूलाई ४८ घण्टे अभिमुखिकरण समेत प्रदान गरेको थियो ।