खोज

सुर्खेत,११ बैशाख ।

कर्णाली प्रदेशका तीनवटा स्थानीय तहमा अझै स्वास्थ्य विमा कार्यक्रम सञ्चालन हुन सकेको छैन । प्रदेशका ७९ पालिकामध्ये तीनवटामा स्वास्थ्य बिमा कार्यक्रम लागु भएको छैन । डोल्पाको, छार्का ताङसोङ, शे फोक्सुण्डो र डोल्पो बुद्ध गाउँपालिकामा बिमा कार्यक्रम लागू हुन सकेका छैनन् ।

भैगोलिक विकटताका साथै सडक, बत्तीलगायतका सुविधा नपुगेको दुर्गम पालिका भएकोले कार्यक्रम लागू हुन नसकेको कर्णाली प्रदेश विमा बोर्डका संयोजक महेशप्रशाद ठाकुरले बताए । ‘उक्त क्षेत्रमा मौसमी बसाई हुनुको साथै बस्ती पनि पातलो रहेको छ’ उनले भने, ‘जसको कारण पनि कार्यक्रम लागु गर्न समस्या भइरहेको छ ।’ बोर्डका संयोजक ठाकुरले सो ठाउँमा बिमा दर्ता कर्मचारी पनि छनोट गर्न नसकेकोजस्ता समस्याले बिमा कार्यक्रम लागू गर्न नसकिएको जानकारी दिए । यो वर्ष लागू गर्ने प्रयास जारी रहेको उनको भनाई छ । उक्त क्षेत्रका स्थानीय तथा सरोकारवाला व्यक्तिहरुको सहभागितामा अन्तरक्रिया तथा छलफल पछि कार्यक्रमको सञ्चालन गरिने उनले बताए ।

सरकारले २०७२ चैत २५ देखि लागू गरेको छ । कर्णालीमा भने दुई वर्षपछि ०७४ भदौ १ देखि लागू भएको थियो । यस प्रदेशमा जुम्ला र रुकुम पश्चिमबाट स्वास्थ्य बिमा कार्यक्रम लागू भएको हो । कर्णालीमा स्वास्थ्य बिमा कार्यक्रमको कार्यान्वयन कमजोर रहेको छ । स्वास्थ्य विमा कार्यक्रममा आवद्ध भएका नागरिकहरुले सेवा लिन सास्ती भएको गुनासो गर्दै आइरहेका छन् ।
कर्णालीमा स्वास्थ्य विमा लागु भएको ७ वर्षसम्म ३० प्रतिशत नागरिक कार्यक्रममा आवद्ध भएको बोर्डका संयोजक ठाकुरले बताए । कर्णालीमा १६ लाख बढी जनसंख्या रहेको छ ।

नागरिक आबद्ध हुन नसक्नु मुख्य कारणमा चेतनास्तर कमजोर हुनुको साथै बिमा कार्यक्रम प्रभावकारी कार्यान्वयन नहुँदा कमै मात्रामा नागरिकहरु समावेश भएका छन् ।स्वास्थ्य बिमा गरेबापत सूचीकृत भएका स्वास्थ्य संस्थाहरुले भुक्तानी पाउन सकेका छैनन् । स्वास्थ्य बिमा बोर्ड कर्णालीका अनुसार चालु आर्थिक वर्षको फागुन १५ गतेसम्म २० करोड ६७ लाख ८४ हजार ६ सय ६७ रुपैयाँ मात्र भुक्तानी भएको छ । जसमध्ये सबैभन्दा धेरै कर्णाली प्रदेश अस्पतालमा ७ करोड ४४ लाख ५६ हजार रुपैयाँ भुक्तानी भएको छ ।