खोज

सुर्खेत, ३ वैशाख ।

कर्णाली प्रदेश सरकारले एक वर्षको प्रगति विवरण सार्वजनिक गरेको छ । प्रदेश सरकारको नेतृत्व सम्हालेको एक वर्ष पूरा भएपछि मुख्यमन्त्री यमलाल कँडेलले आफ्नो वार्षिक कार्यप्रगति सार्वजनिक गरेका हुन् । २०८० चैत २७ नेकपा (माओवादी केन्द्र) को समर्थनमा मुख्यमन्त्री बनेका कँडेलले चार महिना नबित्दै २०८१ साउनमा सत्ता साझेदार दल फेर्नु परेको थियो । अहिले नेपाली कांग्रेससँगको सहकार्यमा कँडेल नेतृत्वको सरकार छ ।

मुख्यमन्त्री कँडेलले आफुले नेतृत्व लिएको एक वर्षको अवधिमा अधुरा योजनाहरुलाई प्राथमिकता दिएको बताए । नयाँ सुरुवातमात्रभन्दापनिविगतमा सुरु भएर अलपत्र रहेका योजनालाई अगाडी बढाइएको उनले बताए । ‘नयाँ–नयाँ कार्यक्रम ल्याइने तर पूरा नहुने समस्यालाई सूक्ष्म विश्लेषण गर्दै प्रदेश सरकारबाट विगतमा सुरुवात गरिएका महत्वपूर्ण र रणनीतिक कार्यक्रमलाई आवश्यक सुधारसहित नतिजामूलक ढङ्गबाट कार्यान्वयन गर्न जोड दिएको छु,’ उनले भने ।

विगतमा अलपत्र परेको मंगलगढी–लाटीकोइली सडक यसै वर्ष निर्माण पूरा भएको, बालुवा संग्रही–खलङ्गा सडक, सल्लीबजार–चौरजहारी सडक, बड्डीचौर–खम्बागाडेलगायत विगतमा अलपत्र आयोजनाको काम सुचारु हुनुलाई आफ्नो प्रगति विवरणमा उल्लेख गरेका छन् भने कानुन निर्माण, मन्त्रिपरिषद्का निर्णयदेखि नियमित हुने सडक, बिजुली, खानेपानी, पुल निर्माणलाई पनि सरकारले ठूलो उपलब्धि मानेको छ ।

मुख्यमन्त्री कँडेलले दोस्रो पञ्चवर्षीय योजना निर्माणदेखि प्रदेशका १० वटा जिल्लामा गरेको भ्रमणलाई पनि उपलब्धिको रूपमा प्रस्तुत गरेका छन् । उनले जथाभावी बजेट वितरण प्रवृत्तिमा रोक लगाएको, मनलाग्दी रकमान्तर रोकेको, उपभोक्ता समितिबाट हुने बदमासीलाई नियन्त्रण गरेको पनि प्रगति विवरणमा उल्लेख गरेका छन् ।

त्यसैगरी कर्णाली प्रदेश सरकारले अहिलेसम्म नौ वटा ऐन निर्माण गरेको छ । पछिल्लो एक वर्षको अवधिमा भौतिक पूर्वाधारतर्फ कर्णालीमा ९५ किलोमिटर कालोपत्रे, दुई सय पाँच किलोमिटर ग्राभेल, २३ वटा पक्की पुल, ४२ वटा झोलुङ्गे पुल, आठ वटा सार्वजनिक भवन निर्माण भएको बताइएको छ ।

मुख्यमन्त्री कँडेलले साउन महिनामै बजेट कार्यान्वयन सम्बन्धी मातहतका निकायलाई नौ बुँदे प्रतिबद्धता गराए बमोजिम ७० प्रतिशत बढी अलपत्र आयोजनाको काम सुरु भएको दाबी गरेका छन् । चालु आर्थिक वर्षको फागुन मसान्तसम्म १५ प्रतिशत विकास बजेट कार्यान्वयन हुनुलाई पनि मुख्यमन्त्रीले आफ्नो प्रगति ठानेका छन् । हाल ९० प्रतिशत योजना कार्यान्वयनमा गएकाले असार मसान्तसम्म अधिकांश आयोजनाले पूर्णता पाउने मुख्यमन्त्रीको दाबी छ ।