खोज

गुल्मी, २५ चैत ।
गुल्मीको मालिका गाउँपालिका वडा नं. ८ मा रहेको थानपती आधारभूत विद्यालयले शैक्षिक सुधारका लागि १० लाख भन्दा बढीको अक्षयकोष स्थापना गरेको छ । विद्यालय व्यवस्थापन समितिको अगुवाईमा शिक्षकलाई तलब र अन्य शैक्षिक क्रियाकलापका लागि अभियानै सञ्चालन गरी आर्थिक सङ्कलन मार्फत अक्षयकोष स्थापना गरेको हो । अक्षय कोषबाट प्राप्त ब्याजबाट खर्चको जोहो गर्ने गरी रकम सङ्कलन गरी ‘थानपती कल्याणकारी कोष’ स्थापना गरिएको विद्यालय व्यवस्थापन समितिका अध्यक्ष डिबी खड्काले बताए । अभियानबाट १० लाख ३४ हजार ७ सय रूपैंयाँ सहयोग सङ्कलन गरिएको हो । ‘ग्रामीण विद्यालयमा कुनै आर्थिक स्रोत छैन्,’ उनले भने, ‘उठेको रकम अक्षयकोष हुने गरी ब्याजबाट खर्च चलाउने छौँ ।’

विद्यालयले महायज्ञ, मेला महोत्सव र धनधान्यञ्चल गर्दा आधा रकम त्यसको व्यवस्थापनमा खर्च हुने र ब्यापर गरे जस्तो देखिने हुँदा अभियान चलाएर सिधा सहयोग सङ्कलन गरिएको अध्यक्ष खड्काले बताए । अक्षयकोषमा न्यूनतम १ हजार ५ सयदेखि अधिकतम ५५ हजार ५ सय ५५ रूपैयाँसम्म सहयोग गरेका छन ।विद्यालयले १५ हजार माथि सहयोग गर्ने दाताहरूको नाम ताम्रापत्र र ५० हजार माथि सहयोग गर्नेहरूको ताम्रपत्रमा दुई पुस्ते नाम लेखिने जनाएको छ । अक्षय कोषको रकम गाउँमै लगानी गरिने बताईएको छ । त्यसका लागि ७ सदस्यीय कोष परिचालन समिति गठन गरिएको छ ।
एक सय २२ जना विद्यार्थीहरू रहेको उक्त विद्यालयमा १२ जना शिक्षक छन् । विद्यालय व्यवस्थापन समितिले खानेपानी, शौचालय, खेलमैदान, विभिन्न विधामा विद्यार्थी पुरस्कार र अभिभावक सम्मान लगायतका कार्यक्रम मार्फत नयाँ शैक्षिक सुधारका कार्यक्रम अगाडि बढाएको छ । पछिल्लो समयमा शैक्षिक सुधारमा अग्रसर रहेको थानपती आधारभूत विद्यालय जिल्लामा उत्कृष्ट विद्यालयको रूपमा सम्मानित भएको थियो । विद्यालयको अभियानमा एक सय २७ जनाले सहयोग गरेका छन् ।