पर्सा, १२ चैत।
चालू आर्थिक वर्षको आठ महिनामा वीरगञ्ज भन्सारबाट ५३ अर्ब २६ करोड मूल्य बराबरका विभिन्न सामानहरूको निर्यात गरिएको छ, जुन गत आर्थिक वर्षको यही अवधिको तुलनामा १०० प्रतिशतभन्दा बढी, अर्थात् १७२ दशमलव ०१ प्रतिशत वृद्धि भएको छ।
वीरगञ्ज भन्सार कार्यालयका प्रमुख दीपक लामिछानेका अनुसार, यस वर्ष भटमासको तेलको निर्यातमा विशेष वृद्धि देखिएको छ। आठ महिनामा २८ अर्ब १९ करोड मूल्य बराबरको १३ करोड ४७ लाख १० हजार एक सय ४२ लिटर भटमासको तेल निर्यात भएको छ।
त्यस्तै, जुस र फलामका सामग्रीहरूको निर्यात पनि उल्लेखनीय रूपमा बढेको छ। चार अर्ब ८८ करोड मूल्य बराबरको जुस र तीन अर्ब ६८ करोड मूल्यको फलाम तथा फलामका सामग्री निर्यात भएको जनाइएको छ। यो निर्यात वृद्धि नेपाली अर्थतन्त्रका लागि सकारात्मक संकेत रहेको छ।
