खोज

बुटवल, ०८ चैत ।

बुटवल उपमहानगरपालिका प्रमुख खेलराज पाण्डेयले बुटवलका साना वा ठूला व्यवसायीहरू जो कोही भएपनि उनीहरूलाई टिकेर व्यवसाय गर्ने वातावरण निर्माणको लागि नगरपालिका जहिले पनि तयार भएको बताएका छन् । व्यवसायीहरूको हक, हित र व्यवसायिक दिगोपनाको लागि नगरपालिकाले के कस्तो सहयोग गरेर सहकार्य गर्न सकिन्छ यसमा सदैभ पालिका तयार रहेको बताएका हुन् ।

खुद्रा किराना व्यवसायी संघ रूपन्देहीको आयोजनामा बुटवलमा आयोजना गरिएको व्यवसायी तथा उपभोक्ताको क्षमता विकास तथा अभिवृद्धि तालिमको शुभारम्भ गर्दै नगर प्रमुख पाण्डेयले कुनै पनि व्यवसायी दर्ता भएर सरकारी मापदण्ड अनुसार सञ्चालन भएको अवस्थामा व्यवसायीको पेशागत सुरक्षाको लागि नगरपालिकाले योजना बनाएर अगाडी बढ्ने समेत बताए । उनले खुद्रा किराना व्यवसायीहरूले सामूहिक रूपमा मिलेर एउटा नमुनाको रूपमा सामूहिक मार्ट स्थापना गर्न सक्ने भन्दै यसको लागि पालिकाले के कस्तो सहयोग गर्नुपर्ने हो यसमा तयार रहेको बताए ।

खुद्रा किराना व्यवसायीहरूले पटक–पटक उठाउँदै आएको विषय, पोके तथा डोके विना दर्ता भएका व्यवसायीहरूको कारण दर्तावाला व्यवसायीहरूले मर्कामा परेको गुनासो आउने गरेको भन्दै उनले केही दिन यता सडक किनाराबाट हटाइएका केही विना दर्तावाला व्यवसायीहरू देखिएको भन्दै सडक निर्माण पुरा हुनासाथ हस्पीटल लाईन लगायतका स्थानबाट कडाईका साथ हटाउने समेत बताए । बुटवलको अमरपथ, ट्राफिक चौक क्षेत्रमा सन्ध्याकालिन बजार र बुटवलको कालिका पथमा रात्रीकालिन बजारको परिकल्पना गरिएअनुसार हाईमाष्ट लाईट, सीसीटिभी क्यामेरा समेत जडानको काम अगाडि बढेको भन्दै उनले सन्ध्याकालिन बजार र रात्रीकालिन बजार स्थापनाको लागि सबैले सहकार्य गर्नुपर्ने बताएका थिए । संस्थाका अध्यक्ष महेन्द्र पोखरेलले कार्यक्रममा सहजीकरण गर्दै झोले, पोके, विना दर्ता भएका व्यवसायीहरूको कारण स्थानीय निकाय, सम्बन्धीत निकायमा दर्ता भएर नियमित रूपमा कर तिर्दै आएका व्यवसायीहरु मर्कामा परेको भन्दै यसको नियन्त्रणको लागि नगरपालिका संग माग गरेका थिए ।

कार्यक्रममा बुटवल उपमहानगरपालिका अनुगमन तथा व्यवसाय प्रवद्र्धन महाशाखा प्रमुख उप निर्देशक ठगिश्वर पोखरेल, खाद्य प्रविधि तथा गुण नियन्त्रण कार्यालय भैरहवाका खाद्या अधिकृत श्रवण ढुंगाना, उपभोक्ता हित संरक्षण मञ्च बुटवलका अध्यक्ष समुन्द्र जिसीले कार्यपत्र प्रस्तुत गर्दै उपभोक्ता अधिकारको लागि सचेत हुनुपर्नेमा जोड दिएका थिए । कार्यक्रममा कार्यक्रममा खुद्रा किराना व्यवसायी संघका संस्थापक अध्यक्ष टिकाराम गैरे, पूर्व अध्यक्ष कमला गौतम, मोहन बस्याल सल्लाहकार कृष्णप्रसाद पाण्डे, महासचिव दघिराम ज्ञवाली, उपाध्यक्ष एवं कार्यक्रम संयोजक गोपाल कुमार प्रधान लगायतले आ–आफ्नो भनाइ राखेका थिए ।