खोज

बुटवलको अमरपथ र ट्राफिक चोकमा सन्ध्याकालीन तथा कालिकापथ क्षेत्रमा रात्रीकालिन बजार सञ्चालन गर्ने बिषयमा भैरहेको प्रयास सार्थक हुँदैछ । बुटवल उपमहानगरले बुटवलमा सन्ध्याकालीन तथा रात्रीकालीन बजारका लागि आवश्यक पूर्वाधार तयार भैसकेको बताउँदै जिल्ला प्रशासन कार्यालयमार्फत आवश्यक सहयोग गर्न माग गरेको छ । त्यसो त बुटवल उद्योग वाणिज्य संघ र होटल तथा रेष्टुरेण्ट व्यवसायी संघले पनि बुटवलको बजार चलायमान बनाउने प्रमुख आधार रात्रीकालीन बजार हुने भन्दै धेरै पहिलेदेखि प्रयास गर्दै आएका छन् । जेहोस् प्रशासन कार्यालय सकारात्मक भएको छ । रात्रीकालीन बजारका लागि सवै प्रकृया पूरा भैसकेकोले अव अनुमति दिएर बुटवलको विकासमा एउटा इट्टा थप्ने काम गरिनुपर्दछ । आम आम बुटवलबासीको माग हो । बुटवलमा रहेको लुम्बिनी प्रदेशको अस्थायी राजधानी दाङको देउखुरी लगिएपछि बुटवल एक हिसावले सन्नाटामा छ । बुटवलको आर्थिक विकासमा असर पर्ने कुरा निश्चित थियो । त्यही भयो । अव बुटवललाई चलायमान वनाउने आधार रात्रीकालीन बजार हुनसक्छ । बुटवलका उद्योगी व्यवसायी, होटल व्यवसायी तथा बुटवलका स्थानीय सवैले यही आवश्यकता बोध गरेका छन । अव रात्रीकालीन बजारले सार्थकता पाउने अपेक्षा गरिएको छ । बुटवलबाट राजधानी दाङ सरेपछि बुटवललाई आर्थिक राजधानी बनाउने कुरा अहिले सेलाउँदै गएको छ । वुटवल त्यसैपनि पश्चिम नेपालको बाणिज्य केन्द्रको रूपमा विकास भैरहेको छ । बुटवल पश्चिम नेपालको मात्र नभै समग्र लुम्विनी प्रदेशको औद्योगिक र बाणिज्य केन्द्र हो । त्यसैले यसलाई आर्थिक राजधानी भनिँदा अस्वाभाविक लाग्दैन । बुटवल आर्थिक राजधानी बनिरहँदा यहाँको व्यापार व्यवसाय पनि त्यहीरूपमा विकसित र परिमार्जित हुनु जरुरी छ । त्यसको पहिलो प्रयासको रूपमा बुटवल उद्योग वाणिज्य संघ र होटल तथा रेष्टुरेण्ट व्यवसायीले धेरै पहिलेदेखि गरिरहेको पहल सकारात्मक छ ।

बुटवलका होटल व्यवसायीले कालिकापथलाई रात्रीकालीन बजारको रूपमा विकास गर्न बर्षौदेखि माग गर्दै आएका छन् । बजार सञ्चालनको निश्चित तालिका नहुँदा होटल व्यवसाय सञ्चालनमा धेरै समस्या आउने गरेको होटल व्यवसायीको पीडा छ । अर्कोतर्फ रात्रीकालीन होटल सञ्चालन गर्दा बुटवलको गरिमा र प्रतिष्ठालाई पनि ध्यान दिनुपर्ने जरुरी छ । त्यसमा होटल व्यवसायी सचेत हुनुपर्ने छ । भोली एक दुईवटा घटनाले समग्रह बुटवलकै इज्जतमाथि धब्बा लाग्ने काम हुनुहुँदैन । बुटवलमा रात्रीकालीन बजार सञ्चालन गर्दैगर्दा सुरक्षाको मापदण्डलाई बिर्सनु हुँदैन् । रात्रीकालीन बजारमा सवैभन्दा बढी सम्बेदनशील बिषय सुरक्षाकै हो । तसर्थ बुटवलका होटल व्यवसायी सुरक्षाको बिषयमा गंभीर वन्नु जरुरी छ । बुटवलका व्यावसायिक संघ संस्थाहरूले रात्रीकालिन बजार कसरी सञ्चालन गर्न सकिन्छ भन्ने विषयमा छलफल गर्नुको प्रशासनको सुरक्षा मापदण्डलाई मध्यनजर गर्नैपर्दछ । निश्चितरूपमा मुलुक आर्थिक मन्दीका कारण चलायमान बन्न नसकिरहेको बेला कम्तीमा पनि बुटवलमा रात्रीकालीन बजारले नयाँ संभावनाको ढोका खोल्नेछ । बुटवल उपमहानगरले समेत रात्रीकालीन बजारका लाग आवश्यक भौतिक पूर्वाधार निर्माणमा ठूलो सघाउ पु¥याएको छ । सिसिटिभी क्यामराबाट निगरानी, हाईमास्ट लाईट जडान, घुम्ति शौचालयको व्यवस्था गरेर बुटवल उपमहानगरले रात्रीकालीन बजार सञ्चालनमा एउटा आधार खडा गरिदिएको छ । अव रात्रीकालीन बजार सञ्चालनका लागि प्रहरी प्रशासनको सहयोग आवश्यक छ । बुटवललाई रात्रीकालीन बजारका रूपमा स्थापित गर्न सकेको अवस्थामा बुटवल बजार देशकै उदाहरणीय बजार हुनेछ । त्यसले बुटवलको गरिमा र प्रतिष्ठा बढ्नेछ । बुटवलमा रात्रीकालीन बजार सुरु हुँदै गर्दा रूपन्देहीको भैरहवा, तिलोत्तमाको मूख्य बजार, सैनामैनाको मुर्गिया क्षेत्रमा समेत रात्रीकालीन बजारको आधार सिर्जना हुनेछ । तसर्थ राम्रो कामको सुरुवात अब छिटै बुटवलबाट हुँदैछ । यो अभियानमा सवै बुटवलबासी जोडिनु आवश्यक छ । बुटवलको गरिमा र पहिचान श्रीबृद्धिमा रात्रीकालीन बजार गहना सावित हुनेछ । सवै बुटवलबासीले होस्टेमा हैसैं गरौं ।