खोज

बुटवल, ०८ चैत ।
शनिबारदेखि रूपन्देहीकै पुरानो र प्रतिष्ठित तिलोत्तमा गोल्डकप फुटबल प्रतियोगिता शुरु हुँदैछ । देविनगरस्थित एन्फा टेक्निकल खेल मैदान प्रतियोगिता आयोजनाका लागि चिटिक्क सजाईएको छ । वर्षभरि नै खेलकुद गतिविधि हुने रूपन्देहीमा तिलोत्तमा गोल्डकप एक वर्षको अन्तरालमा आयोजना हुन लागेको छ । रूपन्देही जिल्ला फुटबल संघले खेलमैदान ३ महिना अघि मर्मत थालेको थियो । मैदानमा माटो पट्याउने, सम्याउने र निरन्तर पानी राखेर हरियो बनाउने काम ३ महिनादेखि रूपन्देही जिल्ला फुटबल संघले थालेको हो । ‘मैदानमा प्रवेश रोक लगाएर नै मर्मतको काम गरेका छौं,’–मैदान संयोजक बुद्धि गुरुङले भने । खेललाई ब्यवस्थित, सुरक्षित र दर्शकको सुविधालाई ध्यानमा राखेर पूर्वाधार मर्मत गरेको उनले बताए । चारैतिर तारजाली गर्ने, रंगरोगनमात्र नभई यसपटक मुल गेट नजिक न्यु होराईजन माबिको सहयोगमा नमुना शौचालय निर्माण गरिएको उनले बताए ।

बुद्धि गुरुङ
खेल मैदान संयोजक

फुटबल खेलको उर्वरभूमि मानिने रूपन्देहीमा वर्षभरि नै फुटबल प्रतियोगिता चलिरहेको छ । अझ सैनामैन नगरपालिकामा भर्खरमात्र यो वर्ष नयाँ गोल्डकप शुरु भएको छ । बुटवल उपमहानगरपालिकाको संरक्षक तथा यशोदा फुड्स प्रालि र त्रिमूर्ति ईण्डस्ट्रिज प्रालिको मुख्य प्रायोजक, प्रदेश खेलकुद परिषद लुम्बिनी मुख्य सहयोगी संस्था रहेको प्रतियोगिताको २३ औ संस्करणको सम्पूर्ण तयारी पुरा भएको रूपन्देही जिल्ला फुटबल संघका अध्यक्ष लोक पुनले बताए । नेपालमा खप्तड, बिराट, आहारारा र तिलोत्तमा चार मुख्य गोल्डकप हुने गरेको भन्दै उनले तिलोत्तमा यसैमध्येको एक भएको दाबी गरे । प्रतियोगिताको गरिमा कै कारण यो वर्ष पुरस्कार राशीमा समेत अघिल्लो संस्करणभन्दा १ लाख रूपैयाँ वृद्धि गरिएको उनले बताए । ‘प्रतियोगिताको उपाधि विजेता टिमले नगद १२ लाख १२ हजार २ सय २२ रूपैयाँ, गोल्डकप, प्रमाणपत्रबाट पुरस्कृत गरिने छ,’–उनले भने ।

लोक पुन
अध्यक्ष, एन्फा रुपन्देही

यसैगरि उपविजेता टिमले ६ लाख, ६६ हजार, ६ सय, ६६ रूपैयाँ तथा विधागत उत्कृष्ट खेलाडीहरूलाई गोलरक्षक, डिफेन्डर, मिड फिल्डर, फरवार्ड, कोचलाई नगद ३१ हजार र कप तथा सर्वोत्कृष्ट खेलाडीलाई स्कुटर वा मोटरसाईकल उपहार तथा प्रत्येक दिनको म्यान अफ दी म्याचलाई नगद ११ हजार १ सय ११ रूपैयाँबाट पुरस्कृत गरिने उनले बताए । ब्यस्त स्याडुलका कारण यो वर्ष डिफेन्डिङ च्याम्पियन मनाङ मर्याङदी क्लब भने प्रतियोगितामा सहभागी नहुने उनले बताए । यो वर्ष आयोजक करेन्ट रूपन्देही–११ सहित संकटा एफसी, मच्छिन्द्र एफसी, चर्च ब्याईज युनाईटेड, नेपाल पुलिस क्लब, नेपाल सशस्त्र प्रहरी बलको एपिएफ क्लब तथा दुई विदेशी टिमहरू एडोर्न गडवाल स्पोर्टिङ क्लब, जर्जियन एफसी गरि आठ टिमको प्रतिस्प्रर्धा गर्ने छन ।

यस क्षेत्रकै गरिमा बोकेको फुटबल प्रतियोगितालाई निरन्तर आयोजना गरेको अनुभवी एन्फा जिल्लाका पूर्वअध्यक्ष तथा केन्द्रीय उपाध्यक्ष दिर्घ बहादुर केसी आफनो समयमा देश, विदेशबाट सहयोग जुटाएर प्रतियोगिता गरेको बताउछन । फुटबलको क्रेज कै कारण प्रतियोगिता निरन्तरता गर्नुपर्ने र आर्थिक पाटोमा चुनौती हुने गरेको उनी बताउछन । ‘पछिल्लोसमय प्रतियोगिता आयोजनामा स्थानिय सरकार र ब्यवसायीक घरानाको राम्रो सहयोग छ ।’– उनले भने । ब्यस्त स्याडुलका बाबजुद प्रतियोगितामा राम्रा खेलाडी भित्राउने, बिबादरहित निर्णायक र निर्णय, दर्शकलाई खेल मनोरन्जन जस्ता पाटोमा आयोजक सजग हुनुपर्ने उनको सुझाव छ । चैत ९ गतेबाट १६ गतेसम्म संचालन हुने प्रतियोगितामा १ करोड ८ लाख रूपैयाँ, ८८ हजार रूपैयाँ खर्च हुने अनुमान रहेको छ ।

दीर्घ बहादुर केसी
केन्द्रीय उपाध्यक्ष, एन्फा

‘गोल्डकप’ विजेताहरूको ईतिहास
तत्कालीन बुटवल नगरपञ्चायतले २०३१ सालमा स्थापना गरी २०३३ सालदेखि प्रतियोगिता सुरु भएको थियो । बुटवल उपमहानगरपालिकाको संरक्षकत्वमा रहेको यो प्रतियोगिता जिल्ला फुटबल संघले आयोजना गर्दै आएको छ । बि.सं. २०३३ सालमा भएको पहिलो खेलमा सिद्धार्थ खेलकुद परिषद् रूपन्देही विजयी भएको थियो । दोस्रो संस्करण बम्बई फर्टिलाईजर मुम्बई, तेस्रो, नवौं, दशौं र तेह्रौमा महेन्द्र पुलिस क्लब, चौथो, पांचौ र छैटौंमा कालिका स्पोर्टिङ क्लब, सातौं जनकपुर चुरोट कारखाना विजयी भएका थिए ।त्यस्तै, आठौमा आरएनएसी, एघारौंमा महिन्द्रा एण्ड महिन्द्रा मुम्बई, बाह्रौं र सोह्रौमा त्रिभुवन आर्मी क्लब, चौधौं र अठारौंमा रूपन्देही ११, पन्ध्रौमा फ्रेन्ड्स क्लब, सत्रौमा जावलाखेल युथ क्लब र १९ औं संस्करणको उपाधि सिएमसी संकटा क्लवले जितेका थिए । २० औं तिलोत्तमा गोल्डकपको उपाधि थ्रिस्टार क्लव काठमाडौं, २१ औं संस्करणको उपाधि क्यामरुनको दाउफिन्स क्लबले जितेको थियो । २२ औ संस्करण भने मनाङ मस्याङ्दी क्लब, काठमाडौ विजेता रहेको थियो ।

कस्तो छ करेन्ट रूपन्देही–११
यशोदा फुड्स प्रालि, त्रिमुर्ति ईण्डष्ट्रिज प्रालीको मुख्य प्रायोजन रहेको प्रतियोगितामा आयोजक करेन्ट रूपन्देही–११ टिम यसपटक फाईनल पुग्ने गरि तयारी रहेको प्रशिक्षक पुकार गहतराज बताउँछन । राष्ट्रिय टिमबाट खेलेका अनुभवी गोलकिपर विशाल सुनारले रूपन्देहीको पोष्ट सम्हाल्दैछन । यसैगरि टिममा रूपेश केसी, सुरज थारुसहित ४ जना विदेशी खेलाडीको समेत टुगो लागेको उनले बताए । ‘युवा स्थानिय खेलाडीहरू मिश्रित गरि रूपन्देही ११ तयार भएको छ,’–उनले भने ।प्रत्येक टिममा ३ जना विदेशी र एकजना एशियन मुलका गरि ४ जना विदेशी खेलाउन पाउने एन्फाको मापदण्ड अनुसार नै खेलाडी खेल्न पाउने प्रावधान छ । २१ औं संस्करणमा सेमीफाईनलमा विभागिय टिम नेपाल पुलिस क्लबसँग रूपन्देही पराजित भएको थियो भने अघिल्लो संस्करण पहिलो चरणमा बाहिरिएको थियो ।