खोज

भैरहवा, ७ चैत ।

रुपन्देहीको भैरहवामा बिहीबारदेखि उर्जा प्रभावकारी भवन डिजाइनसम्बन्धि तीनदिने कार्यदक्षता अभिवृद्धि तालिम सुरु भएको छ । सोसाईटी अफ नेपलीज आर्किटेक्टस् (सोना) ले बिल्डिङ इनर्जी इफीसेन्सी इन नेपाल (बीन) परियोजनाको सहयोगमा निर्माणका क्षेत्रमा कार्यरत आर्किटेक्ट र इन्जिनियरहरुका लागि तालिम आयोजना गरेको हो ।

तालिमको शुभारम्भ कार्यक्रममा सोनाका अध्यक्ष ईश्वर जोशीले बीन परियोजनासँग सहकार्य गर्दै निर्माण क्षेत्रमा कार्यरत आर्किटेक्ट र इन्जिनियरहरुलाई लक्षित गर्दै तालिमको आयोजना गरिएको बताए ।  ‘सोनाले ऐतिहासिक सम्पदाको संरक्षण र विकासमा समेत योगदान पुर्याउँदै आएको छ, अध्यक्ष जोशीले भने–‘भौतिक संरचनाको डिजाइन गरेर सुन्दर शहर, बस्ती निर्माणमा हाम्रो विशेष भूमिका छ ।’ प्राविधिक जनशक्तिलाई लक्षित गर्दै तालिमको आयोजना गरिएको उनको भनाइ छ ।

२ सय जना प्राविधिक जनशक्तिलाई तालिम दिने उद्देश्य रहेकोमा हालसम्म १५१ जनालाई दिइसकिएको उनले जानकारी दिए । भैरहवामा सञ्चालित तालिममा ५६ जनाको सहभागीता रहेको उनले बताए । तालिममा सहभागी प्राविधिक जनशक्तिको दक्षता अभिवृद्धि हुने उनले विश्वास व्यक्त गरे ।

त्यस्तै बीन परियोजनाका टीम लिडर सुरेश प्रजापतिले भवन निर्माणका लागि संरचनात्मक सुरक्षामा ध्यान दिनुपर्ने बताए । ‘सुरक्षामा ध्यान दिएर भवनको डिजाइन गर्नुपर्छ, ’उनले भने ।

परियोजनाको कार्यक्षेत्र बागमती, लुम्बिनी र गण्डकी प्रदेशका ६० वटा स्थानीय तह रहेको उनले जानकारी दिए । निर्माण क्षेत्रमा काम गर्ने जनशक्तिलाई क्षमता अभिवृद्धि तालिम दिदै आएको उनको भनाइ छ । तालिममा सिकेका कुराहरुलाई व्यवहारिक रुपमा सदपयोग गर्न उनले प्रशिक्षार्थीहरुलाई आग्रह गरे । उर्जा प्रभावकारी भवन नबनाइए स्वास्थ्यसम्बन्धी जोखिम पनि बढ्ने उनले बताए ।

सघन शहरी तथा भवन निर्माण आयोजना भैरहवा, रुपन्देहीका आयोजना प्रमुख राजु न्यौपानेले भवन निर्माण गर्दा डिजाइन र प्रयोग गरिने निर्माण सामग्रीबारे ध्यान दिनुपर्नेमा जोड दिए । उनले तालिम पूर्णरुपमा सफल हुने विश्वास व्यक्त गरे ।

बीन परियोजनाका कन्सलटेन्ट इन्जिनियर विशाल पाण्डेको सञ्चालनमा कार्यक्रम सम्पन्न भएको थियो । तालिमको पहिलो दिन आर्किटेक्ट उद्भास पुरी, इन्जिनियर विशाल पाण्डे र आर्किटेक्ट प्रभा पाण्डेले सहजीकरण गरेका थिए ।