कास्की ।
नेपाल र चीन बीचको कूटनीतिक सम्बन्धको ७० वर्ष पूरा भएको अवसरमा, सिचुआन प्रान्तको सहयोगमा सिचुआन एअरलाइन्सले भोलिदेखि पोखरा अन्तर्राष्ट्रिय विमानस्थलमा पहिलो पटक नियमित व्यावसायिक चार्टर उडान सञ्चालन गर्ने घोषणा गरेको छ।
यस उडानले नेपाल र चीनबीचको हवाई सम्पर्कलाई थप मजबुत बनाउँदै, पर्यटन प्रवर्द्धन, सांस्कृतिक आदान–प्रदान र व्यावसायिक सहकार्यको क्षेत्रमा नयाँ सम्भावनाहरू खोलेको नेपाल पर्यटन बोर्डको विश्वास छ। पोखरा-छेन्दु उडानको माध्यमबाट मध्य र पश्चिम नेपालका यात्रुहरूलाई कम खर्चमा हवाई सेवामा सहज पहुँच प्राप्त हुनेछ भने, चिनियाँ पर्यटकलाई पोखराको प्राकृतिक सुन्दरताको अनुभव लिन अवसर मिल्नेछ।
नेपाल पर्यटन बोर्डले यस उडानलाई ‘भिजिट नेपाल २०२५’ र ‘पोखरा पर्यटन वर्ष’ अभियानलाई सफल बनाउन महत्त्वपूर्ण कदमको रूपमा हेरिरहेको छ। यसले नेपालमा अन्तर्राष्ट्रिय पर्यटकको आगमनमा वृद्धि गर्ने र दुई देश बीचको सम्बन्धलाई अझ प्रगाढ बनाउने अपेक्षा गरिएको छ।
