खोज

सामाजिक सद्भाव, एकता, सहअस्तित्व र रङ्हरूको पर्व होली हाम्रो घर आँगनमा आईपुगेको छ । हरेक बर्ष हिमाली र पहाडी जिल्लामा एक दिन र त्यसपछिको अर्को दिन तराईका जिल्लामा होली धुमधामका साथ खेलेर मनाईन्छ । जस अनुसार तराईको होली आज खेलिदैछ । होलीको पूर्व सन्ध्यामा बिहीवार बुटवल उद्योग बाणिज्य संघले संघको सचिवालयमा होली मिलन कार्यक्रम गरेको छ । होलीलाई त्रेता युगमा भगवान विष्णुका भक्त प्रल्हादसंग जोडेर हेरिन्छ । हिरण्यकश्यपुका पुत्र प्रल्हादलाई फुपु होलिकाले आगोमा भष्म पार्न लाग्दा उनी आफै आगोमा भष्म भएकी थिईन् । सोही दिनदेखि होली पर्व सुरु भएको मानिन्छ । होलीकाले आफूले पाएको अग्नीप्रतिरोधक शक्तिको वरदानलाई दुरूपयोग गरेको हुनाले जलेर मर्नु परेको विश्वास गरिन्छ । यसप्रकार, असत्य माथि सत्यको विजय भएको यही घटनाको स्मृतिमा उल्लाख मनाउन ‘सत्य डग्दैन असत्य टिक्दैन’ भन्ने मान्यताका साथ यो पर्व सुरुवात भएको मानिन्छ । होलीको समयमा चोरी चकारी तथा होलीको बहानामा उच्श्रंङ्खल तथा अपराधिक गतिबिधि पनि हुन सक्ने भएकोले प्रहरी प्रशासनले विशेष ध्यान दिनु जरुरी छ । यद्यपि प्रहरीले होलीको अवसरमा हुने उच्छृंखल गतिविधि नियन्त्रण गर्न सुरक्षा व्यवस्था कडा पारिएको जनाएको छ । वसन्त ऋतुको आगमन र हेमन्त ऋतुलाई बिदाइ गर्ने फागुपूर्णिमामा रङसँग खेलेर मनाइने पर्वको मौलिकता जोगाईराख्नुपर्ने आवश्यकता छ ।

फागुपूर्णिमामा रङसँग खेलेर मनाइने यो पर्व बिग्रिएको सम्बन्ध सुधार्ने अवसर पनि हो । होली सबैका लागि विशेष पर्व हो । यसलाई सुरक्षाको साथमा मनायौँ भने पर्वको रौनकता आउनेछ । तसर्थ होली खेल्नुअघि विशेष ध्यान दिनु जरुरी छ । युवाहरूले होलीलाई पिरती गाँस्ने पर्वका रूपमा लिने गरेका छन् । यस दिन युवक युवती अबिर, रङ खेल्दै ठूलो रौनकका साथ होली खेलिन्छ । पहिले–पहिले पानीमा विविध सुगन्धित वस्तुहरू मिसाइने गरिएपनि अचेल भने पानीको लोला हान्ने प्रबृत्तिले होलीको रौनकता गुमेको महसुस हुने गरेको छ । होली रङको पर्व भएका कारण रङ छ्यापेर यो पर्व मनाउने गरिन्छ । फागु पर्व चीरसंग पनि सम्वन्धित रहेको छ । भगवान् श्रीकृष्णको गोपिनीसँगको सान्निध्यताको प्रसङ्गसंग जोड्ने समेत गरिएको छ । श्रीपञ्चमीका दिन वसन्त श्रवण गर्दा रतिदेवको अर्चना भएपछि फाल्गुन शुक्ल अष्टमीमा चीर गाडेर भगवान् श्रीकृष्णको गोपिनीसँगको प्रेमभावको संस्मरण गर्ने प्रचलन यो पर्वसँग छ । तसर्थ रंगहरूको पर्व होलीलाई प्रेम र सदभावको पर्वका रूपमा मनाउनेतर्फ ध्यान दिनु जरुरी छ ।

होलीको अवसरमा राष्ट्रपति, पूर्व राष्ट्रपति, प्रधानमन्त्री, लगायत नेताहरूले शुभकामना दिदै होलीले राष्ट्रिय एकता कायम गर्न प्रेरणा प्रदान गर्ने विश्वास गर्नुभएको छ । निश्चित रूपमा यो पर्व धर्म, जाति र क्षेत्रभन्दा माथि उठेर एकैसाथ मनाईने भएकोले यसले राष्ट्रिय एकता अभिबृद्धिमा ठूलो योगदान पु¥याउँछ । एक अर्कालाई रङ लगाई खुसियाली साटासाट गर्दै खेलिने फागु पर्व अर्थात होलीले हामी नेपालीबीच रहेको धार्मिक र सांस्कृतिक सदभावलाई अझै घनिभूत वनाउन सहयोग पु¥याउँछ । अन्यायमाथि न्यायको विजयको शाश्वत सन्देश दिने यो पर्वलाई नेपाली समाजले हरेक वर्ष पारिवारिक स्नेह, पारस्परिक एकता र सामाजिक सद्भावका साथ मनाउँदै आएको छ । वसन्त ऋतुको आगमनसँगै आपसी मेलमिलाप र सद्भावनाको सन्देश लिई आएको फागु पर्वले सबैको घर परिवारमा सुख, शान्ति र समृद्धिको वातावरण सिर्जना गर्दै पारस्परिक एकता र सामाजिक सद्भाव अभिवृद्धि गर्न सबैलाई प्रेरित गर्न सक्नुपर्दछ । होली पर्वका अवसरमा हुने विकृतिलाई निरुत्साहित गर्दै सभ्य रूपमा होली मनाउनुपर्दछ । अहिलेपनि होलीलाई बिकृत वनाउने काम हुँदै आएको छ । तसर्थ होलीलाई सामाजिक एकता र सदभावको पर्वका रूपमा मनाउन लोला हान्ने, फोहोर पानीको प्रयोग गर्ने कामलाई निरुत्साहित गर्नु जरुरी छ । रंगहरूको पर्व होलीले नेपालीबीच एकता र सदभाव बढाओस् । शुभकामना ।