खोज

प्रतिनिधि सभा तथा प्रदेश सभाको निर्वाचनको मिति नजिक आउँदै गर्दा देशका केही स्थानमा निर्वाचनलाई प्रभावित गर्ने छिटफुट तोडफोड र आक्रमणका घटना भएका छन । दैलेखमा उम्मेदवारलाई नै लक्षित गरेर अज्ञात समूहले आक्रमणको प्रयास गरेको समाचार बाहिर आएको छ । चितवनमा पत्रकार रवि लामिछानेको गाडीमाथि आक्रमण भएको छ । निर्वाचनको मुखैमा विभिन्न स्थानमा भैरहेका आक्रमणका घटनाले सुरक्षा संवेदनशीलतालाई अझै सतर्कताका साथ हेरिनुपर्ने अवस्था उत्पन्न भएको छ । निर्वाचनकै समयमा विगतमा समेत संक्रमणकालको फाईदा उठाएर अपराधिक तत्वहरुले हत्या, हिंसा र लूटपाटका घटना मच्चाउने गरेको नौला होइन । पछिल्लोपटक भएका घटनाले निर्वाचनलाई भयरहित वातावरणमा सम्पन्न गर्ने सवालमा आशंका उत्पन्न भएको छ । सरकारले समयमै सुरक्षा व्यवस्थातर्फ ध्यान नदिने हो भने भोलीको दिनमा उम्मेदवारमाथि नै आक्रमण र त्यसले निम्त्याउने अनिश्चितताको भुमरी उत्पन्न नहोला भन्न सकिदैन । सोमवार रातीमात्रै पश्चिमको टिकापुरमा श्रृखलावद्ध तोडफोडका घटना भएको छ । तोडफोडबाट टेकबहादुर साउद स्मृति पार्कको पर्खाल भत्किएको छ भने नागरिक उन्मुक्ति पार्टीको कार्यालयका गेटमा ढुङ्गा प्रहार भएको छ ।
२०७२ साल भदौ ७ गतेको हिंसात्मक घटनाका दिन घरैमा गोली लागेर ज्यान गएका बालक टेकबहादुरको स्मृतिमा पार्क बनिरहेको छ । पार्कमा कात्तिक २१ गते राति पनि अज्ञात समूहले पर्खाल भत्काएको थियो । २०७२ सालको घटनासँग जोडिएको पार्क र त्यही घटनालाई राजनीतिक मुद्दा बनाएर स्थापना भएको नागरिक उन्मुक्ति पार्टीको कार्यालयमा भएका घटनाप्रति स्थानीय स्तरमा चिन्ता र शंका व्यक्त गरिएको छ । अहिलेपनि पर्दाभित्रबाट सद्भाव भड्काएर निर्वाचनलाई भाँड्ने प्रयास भएको प्रति सुरक्षा निकाय संवेदनशील वन्नुपर्ने खाँचो देखिएको छ ।
२०७२ साल भदौ ७ र ८ गते भएको हिंसात्मक र ध्वंसात्मक घटनाबाट त्राण नपाएको टीकापुरमा सोही घटना निकटका क्षेत्रमा निर्वाचनको मुखमा भएका तोडफोडका गतिविधिले त्यहाँ त्रास बढाएको छ ।

अहिले निर्वाचन सफल वनाउने अभियानमा मुलुककै ठूला दल नेपाली कांग्रेस, नेकपा एमाले र नेकपा माओवादी केन्द्र तल्लिन छन । सरकारले शान्ति सुरक्षामा कुनै कमी हुन नदिने भन्दै जनतालाई आश्वस्त वनाउने काम गरेको छ । निर्वाचनमा भाग नलिने केही दलहरुको अभिव्यक्ति भ्रामक छन । सरकारले निर्वाचन नै गराउन नचाहेको भए निर्वाचनको वातावरण नै तयार हुने थिएन । त्यसकारण विना आधार सरकारलाई आरोप मात्र लगाउने काम भन्दा सरकारले गरिरहेको सुरक्षा सतर्कताका पक्षहरुमा समेत सकारात्मक हुनु जरुरी छ । निश्चित रुपमा अहिले देशका विभिन्न स्थानमा भैरहेका केही घटनाले जनतालाई त्रसित वनाउने प्रयास भएको छ । जनताले असुरक्षाको महसुस गरिरहेका छन । प्रहरी प्रशासनले देशमा नै अस्थिरता उत्पन्न गराउने कृयाकलाप नियन्त्रणमा कुनै कसर बाँकी राख्नु हुँदैन । भयरहित वातावरणमा निर्वाचन सम्पन्न गर्ने सवालमा सरकारले सुरक्षा व्यवस्थालाई थप मजवुद वनाउनु जरुरी छ । छिटफुट घटनाले पनि निश्चितरुपमा प्रहरी प्रशासनमाथि थप चुनौति थपिएको छ । र, आगामी दिनमा यस्ता घटनाको पुनरावृत्ति हुन नदिन फेरिपनि प्रहरी प्रशासन गंभीर हुनु जरुरी छ । सरकारका साथै त्यसका अंगहरु, नागरिक समाज र समस्त जनताले निर्वाचनको सफलताका लागि आफ्नो क्षेत्रवाट गर्नुपर्ने सहयोग र दायित्वमा कुनै कमी हुन नदिनेतर्फ सचेतता थप आवश्यक छ । लोकतन्त्रको प्रमुख सर्त आवधिक निर्वाचन हो । निष्पक्ष, भयरहित र स्वच्छ प्रतिस्पर्धाचाहिँ निर्वाचनका सर्त हुन् । तसर्थ निर्वाचन आउन अव चार दिनमात्र बाँकी रहेकोले निर्वाचनलाई भयरहित तरिकाले सम्पन्न गर्ने अभियानमा सुरक्षा निकाय गंभीर वनोस् । निर्वाचन महासंग्रामको यो अवस्थामा छिटफट घटनालाई सामान्यीकरण नगरियोस् ।