खोज

दाङ, २१ फागुन ।

कर्तव्य ज्यान मुद्दाका फरार प्रतिवादी २४ वर्षपछि पक्राउ परेका छन् । साबिक हाँसिपुर गाविस र हालको राप्ती गाउँपालिका वडा नम्बर ९ का ८१ वर्षका जित बहादुर दमाई र नमी दमिनीलाई पक्राउ गरेको जिल्ला प्रहरी कार्यालय दाङले जनाएको छ । इलाका प्रहरी कार्यालय भालुबाङबाट खटिएको प्रहरी टोलीले खोजतलास गर्ने क्रममा कपिलवस्तु शिवराज नगरपालिका वडा नम्बर १ मा लुकिछिपि बसेको अवस्थामा दुबै जनालाई फागुन १९ पक्राउ गरेको जिल्ला प्रहरी कार्यालय दाङका प्रहरी प्रवक्ता तथा सूचना अधिकारी चक्र बहादुर शाहले जानकारी  दिएका छन ।

दम्पतिले वि.सं. २०४७ साल फागुन २ गते बच्चा जन्माई हत्या गरी बारीमा खाडल खनी पुरेर फरार रहेका थिए । जिल्ला अदालत दाङले २०५७ साल असोज ९ गतेको निर्णय बमोजिम सर्वश्व सहित जन्म कैद सजाय फैसला भएकोमा पुनरावेदन अदालतबाट २०५९ साल जेठ ६ गते जन्म कैद २० वर्ष सजाय फैसला र सवोच्च अदालतको २०६१ साल साउन १४ गतेको निर्णयबाट २० वर्ष कैद फैसला सदर भई हालसम्म पनि फरार रहेको दम्पतिलाई पक्राउ गरेको प्रहरी प्रवक्ता शाहले बताए ।

उनीहरुलाई फैसला कार्यान्वयनको लागि सम्मानित जिल्ला अदालत दाङमा पेश गरीएको र अदालतको आदेश बमोजिम कारागार चलान भएको प्रवक्ता शाहले जानकारी  दिएका छन्  ।