खोज

पछिल्लोसमय मुलुकभर अपराधजन्य घटनामा अस्वाभाविक रूपमा बृद्धि भैरहेको छ । हत्या, लूटपाट, चोरी, डकैतीजन्य घटना अहिले सामान्य भैसकेको छ । संघीय राजधानी काठमाण्डौंमा समेत दिउँसै गोली प्रहारबाट सामान्य नागरिकको ज्यान गएको छ । यी घटनालाई सामान्यरूपमा लिन सकिदैन् । मुलुकमा अराजकता, अस्थीरता, विद्वेष निम्त्याउने प्रयास भैरहेका छन । पछिल्लोसमय रूपन्देहीको मायादेवी गाउँपालिका–२ मा एक युवकको हत्या भएको छ । यो पछिल्लो उदाहरणमात्रै हो । नेपाल भारत खुला सिमाका कारण उपराधका घटनामा ठूलो बृद्धि भएको छ । अपराधजन्य घटनामा बदलाको द्वेष र प्रतिशोध बढ्दै गएको छ । दैनिक भैरहेका घटनाक्रमले देशका विभिन्न स्थानमा आपराधिक मनोबृत्तिले प्रश्रय पाएको अनुभूति हुँदैछ । रूपन्देहीको सियारी गाउँपालिकाका विभिन्न वडामा पछिल्लोसमय चोरी र डकैतीका घटनामा बढोत्तरी भएको छ । बलात्कारका घटना दैनिकजसो सुन्नुपर्ने नियति नेपालीहरूले भोगिरहेको अर्को दुःखद पक्ष हो । घटनामा संलग्नलाई कारवाहीको साटो सत्ता र शक्तिको आडमा उन्मुक्ति दिने जुन परिपार्टी वसिरहेको छ–त्यसले मुलुकमा अराजकता र दण्डहीनता बढाउन झनै बल प्रदान गरेको छ । सरकार तथा सत्ता नजिक भएकाहरूले शक्तिको आडमा गरिरहेका आपराधिक घटना प्रशासनले ढाकछोप गर्दै आएको छ । जसको पछिल्लो शिकार देशका विभिन्न स्थानमा भएका बलात्कार लगायतका विभिन्न घटनाले पुष्टी गरेका छन् । सत्ताधारी दलको भएपछि अपराध गरेपनि मुक्ति पाईने गलत सोच बसेको छ । जसका कारण अहिले मुलुकमा दण्डहीनता बढेको छ । फलस्वरूप देशका मूख्य र सम्वेदनशील स्थानमा पनि बढ्दो अपराधजन्य घटना नियन्त्रणले प्रश्रय पाईरहेको छ । त्यसमाथि खुला सिमाका कारण तराईमा अवैध र अप्रिय घटना भैरहेका छन् । जसको फाईदा आपराधीक तत्वले लिइरहेको छ ।

पटक पटक हुने यस प्रकारका घटनाले शान्ति सुरक्षामाथि पुनः प्रश्न उत्पन्न भएको छ । सरकारले सुरक्षा व्यवस्था प्रभावकारी वनाएको वताएपनि आपराधीक श्रृंखलामा बढोत्तरी भएको छ । त्यसो त यो सरकारको कार्यकालमा मात्रै होइन, श्रृंखलाबद्ध अपराधजन्य घटना धेरै पहिलेदेखि हुँदै आएको । केवल कमबेसीको कुरामात्रै हो । फरक यत्ति हो अहिले धेरै अपराधजन्य घटना भएका छन् । जसमा सर्वसाधारण नागरिकले अनाहकमा ज्यान गुमाउनु परेको छ । सरकार अपराधका घटना नियन्त्रणमा असफल हुँदै गएको हो कि भन्ने चिन्ता उत्पन्न भएको छ । गृह मन्त्रालयले शान्ति सुरक्षाको प्रत्याभूति गरेपनि काठमाण्डौं समेत सुरक्षित छैन भन्ने पछिल्लो घटनाक्रम र उदाहरणले नेपालका दूरदराजका क्षेत्रमा कस्तो अवस्था होला ? सजिलै अनुमान गर्नमात्रै सकिन्छ । यही रूपन्देही जिल्लामा हत्या र लूटपाट तथा चोरीका घटनामा बृद्धि भएको छ । मोटरसाईकल चोरी अहिले सामान्य जस्तै बनेको छ । त्यसमाथि ठगीजन्य अपराधले सिमा नाघेको छ । सरकार र मातहतको प्रहरी प्रशासनले यस प्रकारका घटना नियन्त्रणमा बेलैमा सचेत हुन सकेन भने भोलीका दिनमा ठूलो समस्या निम्तिन सक्छ । यसर्थ सरकार यस प्रकारका घटना न्यूनिकरण र नियन्त्रणमा बेलैमा सचेत हुनु जरुरी छ ।
सरकारले देशको सुरक्षा व्यवस्था मजबुत रहेको दावी गर्दै आएको छ । गृहमन्त्री रमेश लेखकले छिटफुट घटनाबाहेक सरकारले अपराधजन्य घटना नियन्त्रण गरेको दावी गरेका छन । तर, यो दावीमात्रै हो किनभने सामाजिक सञ्जाल र सञ्चार माध्यमले मुलुकमा अपराध बढेको, अपराधजन्य घटनाको निरन्तर फेहरिस्त प्रस्तुत गरिरहेका छन् । सरकारले सुरक्षा व्यवस्था चुस्त वनाउनेतर्फ पहल गर्नु जरुरी छ । हत्या, चोरी र डकैतीका घटनाले निरन्तरता पाउँदै गर्दा नियन्त्रणमा सरकारको ढिलासुस्ती देखिएको छ । तसर्थ अवको दिनमा जनताले सुरक्षित भएर बाँच्न पाउने अवस्थाको सिर्जना गर्नेतर्फ ध्यान जाओस् । जनताको सुरक्षामाथि खेलवाड नगरियोस् । यो बिषयमा सरकारको ध्यान पुगोस् । अपराधका घटना नियन्त्रण राज्यको चुनौति वनिरहेको अवस्थामा भोलिका दिनमा नागरिकले ढुक्कसंग बाँच्न पाउने वातावरण वनाउनेतर्फ राज्यको ध्यानाकर्षण होस् ।