खोज

बुटवलमा विरामीका लागि सरकारी तथा नीजिस्तरमा सुविधा सम्पन्न अस्पतालमार्फत सेवा उपलब्ध भैसकेको छ । हरेक प्रकारका विरामीको परिक्षण तथा स्वास्थ्य उपचार सेवाको उपलब्धता भैरहँदा बुटवलमै जलन अस्पतालको अभाव छ । केही महिनाअघि स्वास्थ्य मन्त्री प्रदिप पौडेलले देशका सातै प्रदेशमा जलन अस्पताल बनाउने सरकारको प्रतिवद्धता दोहो¥याउनु भएको थियो । त्यो प्रतिवद्धता केवल देखावटी वा सस्तो लोकप्रियतामात्रै नबनोस् । बुटवल आएपछि विरामी अन्यत्र जानुपर्दैन भन्ने बुटवलमा उपलब्ध स्वास्थ्य सेवाले प्रमाणित गरिरहेको सन्दर्भमा अव गंभीर प्रकृतिका जलन भएका विरामीको सेवा पनि बुटवलमा भयो भने त्यो लुम्बिनी प्रदेशवासीका लागि अर्को गौरवको कुरा हुनेछ । स्वास्थ्य मन्त्रीले सरकारले जलन अस्पताल स्थापना गरेको अवस्थामा बुटवलमा नै अस्पताल वन्ने बताईसक्नुभएको छ । किनभने बुटवलमा हरेक प्रकारका परिक्षणको सुविधा रहेको छ । त्यो हिसावले बुटवल जलन अस्पतालको लागि उपयुक्त छ । लुम्बिनी प्रदेशकै सवैभन्दा पुरानो इतिहास बोकेको लुम्बिनी प्रादेशिक अस्पताल १२ सय शैयामा विस्तार हुँदैछ । अत्याधुनिक सेवा सुविधा सम्पन्न यो अस्पताललाई पनि जलन अस्पतालको एक युनिटका रूपमा विकास गर्नपनि सकिन्छ । लुम्बिनी प्रादेशिक अस्पताल विपन्नदेखि सम्भ्रान्त विरामीको लागि आस्थाको धरोहर बनेको छ । निश्चितरूपमा त्यति ठूलो अस्पताल वन्नु भनेको बुटवल स्वास्थ्य क्षेत्रमा देशकै पहिलो सुविधायुक्त शहरको रूपमा स्थापित हुनु हो । यो बुटवलको गौरव पनि हो । लुम्बिनी प्रादेशिक अस्पतालको अत्याधुनिक भवन निर्माण सम्पन्न भएर संचालनमा आउँदा बुटवलको चहलपहल यही अस्पतालले बढाउनेछ । निश्चितरूपमा बुटवलको समग्र विकासमा यो अस्पताल कोशेढुंगा सावित हुँदैछ, त्यसमाथि जलन अस्पतालको सेवा र सुविधा थपिँदा बुटवल स्वास्थ्य पूर्वाधारका हिसावले सुविधा सम्पन्न हुने विश्वास गरिएको छ ।

बुटवलमा जलन अस्पतालको आवश्यकता पहिल्यैदेखि खटकिएको हो । गंभीर प्रकृतिका जलनका विरामीको उपचार सुविधा बुटवलमा नहुँदा विरामीलाई अहिलेपनि काठमाण्डौं नै जानुपर्ने बाध्यता छ । जलन अस्पताल स्थापना हुँदा लुम्बिनी प्रदेशका मात्रै होइन, गण्डकी र कर्णाली प्रदेशका विरामीले समेत सुविधा पाउन सक्छन् । तसर्थ यो अत्यन्त आवश्यकताको बिषय हो । एक महिनाअघि काठमाडौंको कमलपोखरीस्थित सानदार मःमः पसलमा भएको ग्यास विस्फोटको घटना यहाँपनि हुने हो भने घाईतेले अकालमै ज्यान गुमाउनु पर्ने अवस्था आउन सक्छ । आर्थिक हैसियत भएकाहरू काठमाण्डौं र भारतसम्म पुग्लान तर विपन्न बर्गले उपचारको अभावमा ज्यान गुमाउनु पर्ने अवस्था आउन सक्छ । तसर्थ जलन अस्पताल अहिलेको आवश्यकतामात्रै होइन, अत्यन्त जरुरीको विषय पनि हो । यद्यपि जलनको उपचार अत्यन्त महंगो छ । जलन अस्पतालको सुविधाले धेरै जलन विरामीका लागि भरोसाको आधार बन्नेछ । काठमाण्डौं कमलपोखरी ग्याँस दुर्घटनामा परेका घाईतेहरू अझैपनि अस्पतालको शैयामा छटपटाइरहेका छन्, कोहीले ज्यान गुमाइसके । काठमाण्डौंमा पनि जलनको उपचारमा आधुनिक सुविधा छैन् । विपन्न मजदुरको उपचारमा राज्यको कुनै चासो छैन् । उनीहरूलाई थप उपचारका लागि भारत लैजानुपर्ने आवश्यकता छ तर सरकारले गरिवको पीडा सुनेको छैन् । जेहोस स्वास्थ्य मन्त्री प्रदिप पौडेलले सातै प्रदेशमा जलन अस्पताल खोल्ने जुन उद्घोष गरेका छन, अत्यन्त सराहनीय काम हो । अव स्वास्थ्य मन्त्रीको प्रतिवद्धता कार्यान्वयनमा आउनुपर्दछ । यति ठूलो अभियानमा स्वास्थ्य मन्त्रीमात्रै होइन प्रधानमन्त्री र मन्त्रिपरिषदका सवै सदस्यहरूको ऐक्यबद्धता प्रकट हुनु जरुरी छ । हरेक बर्ष दूरदराजका नागरिक जलन अस्पतालको सुविधा नहुँदा मृत्युबरण गर्न बाध्य हुनुपर्ने अवस्थाका बीच जलन अस्पताल अहिलेको सवैभन्दा ठूलो आवश्यकता हो । क्यान्सर, मृगौला र मुटु रोगका विरामीको उपचार देशका विभिन्न स्थानमा उपलब्ध छ तर जलनको छुटै अस्पतालबाट उपचार सुविधा नरहेकोले सरकारले यो विषयमा निर्णय गरोस् ।