बुटवल, १७ फागुन ।
एक्स्ट्राटेक ओभल क्रिकेट स्टेडियमका प्रबन्ध निर्देशक बिनोद कुँवरले आफूले बनाइरहेको खेलमैदान सरकारको सम्पत्ति भएको बताएका छन् । रूपन्देहीको तिलोत्तमा–१७ स्थित निर्माणाधीन एक्स्ट्राटेक ओभल क्रिकेट स्टेडियमको स्थलगत अवलोकनमा आएका प्रतिनिधि सभाका शिक्षा, स्वास्थ्य तथा सूचना प्रविधि समितिलाई भ्रमण गराउने क्रममा उनले खेलप्रतिको मायाकै कारण स्टेडियममा लगानी गरेको बताए । ‘ब्यक्तिले शुरु गरेको भएपनि यो सरकारको सम्पत्ति हो, देशकै सम्पत्ति हो ।’– उनले भने । विदेशमा बसेर त्यहाँको विकासको मोडल बुझेर, सिकेर आफनो देशमा अवधारणा उतार्न प्रयास गरेको भन्दै उनले यसलाई अरूबाट पनि अनुसरण गर्न जरुरी रहेको बताए । ‘विदेशमा विकासको मोडेल निजि क्षेत्रबाट नै हुन्छ ।’–उनले भने ।
देशलाई विश्व सामु चिनाउने खेल भएको हुँदा पनि यसमा लगानी गर्न आफू इच्छुक भएको बताए । पाँच वटा टेस्ट राष्ट्र मान्यता पाएका क्रिकेट देशको छिमेकमा रहेको नेपाल उपलब्धि हासिल गर्ने गरी अघि बढ्न ढिलाई भएको उनको गुनासो थियो । ढिलै भएपनि आईसीसीबाट मान्यता प्राप्त हुने गरि मैदानको पूर्वाधार तयार हुँदै गरेको भन्दै उनले पाँच वटा फ्लड लाइट जडान भएको समेत बताए । एकेडेमीको चौथो तल्ला ढलान भैरहेको छ । अभ्यास नेट तयार भएको छ । प्याराफिट बनाउने काम बाँकी छ । ढाई वर्षभित्र २५ हजार दर्शक अट्ने प्याराफिट तयार हुने उनले बताए ।
कार्यक्रममा संघीय संसद प्रतिनिधि सभा शिक्षा, स्वास्थ्य तथा सूचना प्रविधि समितिका सभापति अमर बहादुर थापाले सरकारबाट निजी क्षेत्रमा भएका लगानीलाई आवश्यक सहयोग गर्न जरुरी रहेको बताए । खेल क्षेत्रमा भएको यो लगानी अन्य युवाहरूलाई समेत उदाहरण बनेको भन्दै उनले खेल पर्यटनलाई यसबाट टेवा मिल्ने बताए ।कार्यक्रममा समितिका सदस्य देवेन्द्र पौडेलले खेल पूर्वाधारमा निजी क्षेत्रबाट भएको लगानीमा नयाँ शुरुवात भएको निजी क्षेत्रबाट अर्थ लगानी भएको स्थलमा सरकारको सहयोग सधै रहने भने ।
सरकारबाट आवश्यकता महसुस गरेर नै अध्ययनमा आएको भन्दै यसमा आवश्यक पर्ने सरकारको सहयोगलाई सहजता मिल्ने समेत उनले बताए । कार्यक्रममा समितिका छबिलाल विश्वकर्माले क्रिकेट खेलबाट देशको नाम विश्वमा नै चिनिएको भन्दै यसको पूर्वाधार निर्माणमा भने धेरै ढिला भएको बताए । सरकारको मुख ताक्ने प्रवृत्तिलाई अन्य हुने गरि यो स्टेडियम तयार भैरहेको भन्दै अब अन्य क्षेत्रजस्तै खेलकुदमा गरिएको लगानी समेत व्यावसायिक बन्नेमा आशावादी रहेको उनले बताए ।
कार्यक्रममा तिलोत्तमा नगरका प्रमुख रामकृष्ण खाडले स्टेडियमलाई सडक संजाल, विद्युत र सुरक्षा मुख्य आवश्यकता रहेको भन्दै यसका लागि पालिकाबाट पहल गरिरहेको बताए ।कार्यक्रममा उपप्रमुख जागेश्वरी चौधरी, रूपन्देही जिल्ला प्रशासन कार्यालयका प्रमुख जिल्ला अधिकारी बासुदेव घिमिरे, नेपाल पत्रकार महासंघका अध्यक्ष दिनेश पाण्डे, पत्रकार दीपेन्द्र कुँवरले खेलकुलको उर्वरभूमिका रूपमा चिनिएको रूपन्देहीमा नयाँ गहना थपिएको भन्दै यसलाई सरकारबाट आवश्यक सहयोग जरुरी रहेको बताए ।
