खोज

बुटवल, ३ फागुन।
लुम्बिनी अटोमोबाईल्स एशोसिसयन अफ नेपालको चौथो वार्षिक साधारण सभा शनिबार सम्पन्न भएको छ । कार्यक्रमको एक समारोहका बिच नाडा अटोमोबाईल एशोसियसन अफ नेपालका अध्यक्ष करण कुमार चौधरीले उद्घाटन गर्दै अटो ब्यवसायीहरुको मागप्रति सरकार गम्भिर देखिएको बताए । देशभित्र युवा जनशक्तिलाई रोजगार दिदै आर्थिक समृद्धिमा टेवा दिएको अटो ब्यवसायीहरुको मागलाई सम्बोधन हुने सरकारबाट आश्वासन पाएको उनले बताए ।

कार्यक्रममा लुम्बिनी प्रदेशका पुर्वमन्त्री बिष्णु पन्थीले सडक संजाल नेपालका लागि प्रमुख यातायातको माध्यम भएको बताए । जल यातायात नभएको र हवाईमा कमजोर भएको हुदा सडक संजाल प्रमुख माध्यम भएको उनले दाबी गरे । जनयुद्धको लामो प्रभाव, कोभिड संक्रमण, अन्तराष्ट्रिय राजनितिक र युद्ध लगायतको प्रभाव नेपालको राजनितिक र आर्थिक क्षेत्रमा नकारात्मक प्रभाव पारेको उनले बताए । रेगुलेटर बैक राष्ट्र बैकको भुमिका सहि नभएको उनले बताए । नेपालमा कानुनमा धेरै जटिलता र समस्याहरु रहेको उनले स्विकारे । माकुराको जालोजस्तो एउटाले अर्को काट्ने कानुन हुदा समस्या रहेको उनले बताए । निजी क्षेत्र अघि बढेमात्र देशको आर्थिक विकास हुने उनले बताउदै नेपाल सम्भावना बोकेको क्षेत्र धेरे रहेको बताए । सरकारबाट निजि क्षेत्रलाई काम गर्ने सहज र सरल बाटो खुलाउन उनले आग्रह गरे ।
कार्यक्रममा लुम्बिनी अटोमोबाईल्स एशोसिसयन अफ नेपालका अध्यक्ष गणेश भट्टराईले अटो क्षेत्रलाई चलायमान बनाउने गरि सरकारबाट नीतिगत योजना ल्याउनुपर्ने बताए । कोभिड र आर्थिक मन्दीकै कारण पछिल्लोसमय बैकप्रतिको विश्वास घटेको ब्यवसायीहरुको मन जित्ने गरि बैकबित्तिय संस्थाहरु लाग्नुपर्ने उनले बताए ।

यसैबिच ट्राफिक ब्यवस्थापनमा उत्कृष्ट सेवा गरेका जिल्ला प्रहरी कार्यालय प्युठान सामुदायिक शाखाका प्रनानि सरोज केसी, प्रहरी चौकी मर्यादपुर कपिलबस्तुका प्रहरी हवल्दार प्रेम कार्की, इलाका प्रहरी कार्यालय राजापुर बर्दियाका प्रहरी हवल्दार देबेन्द्र बहादुर साउद, बिमानस्थल सुरक्षा गार्ड नेपालगंज बाकेका प्रहरी सहायक हवल्दार पुष्पा पुनलाई नगद, दोसल्ला र सम्मानपत्रबाट सम्मान गरिएको छ । यसैबिच अटो क्षेत्रलाई संचारमाध्यमबाट प्रचारप्रसारमा योगदान दिएका पत्रकार स्वस्तिक श्रेष्ठ र कपिल ज्ञवालीलाई नगद, दोसल्ला र सम्मानपत्रबाट सम्मान गरिएको संस्थाका महासचिव राम प्रसाद बेल्बासेले बताए ।
संस्थाका वरिष्ठ उपाध्यक्ष तथा मुल कार्यक्रम संयोजक रोशन पाण्डेले साधारण सभाको अवसरमा विविध रचनात्मक कार्यक्रमसंगै नाडा केन्द्र र प्रदेश बिच अन्तरक्रिया समेत गरिएको बताए ।