खोज

सुनवल, ०२ फागुन ।
अमेरिकी सहयोग नियोग मिलेनियम च्यालेन्ज कर्पाेरेसन (एमसिसी) कम्प्याक्ट अन्तर्गत बन्ने प्रशारण लाईनका लागी पश्चिम नवलपरासीमा टावर रहने जग्गाको मुआब्जा वितरण अन्तिम चरणमा पुगेको छ । साढे २१ करोड मुआब्जा मध्ये ७ करोड मात्र भुक्तानी बाँकि छ ।१ सय २४ जनाले मुआब्जा पाउनुपर्नेमा ९४ जनाको खातामा पैसा गईसकेको छ । बाँकी भुक्तानी पनि जग्गाधनीकै समस्याका कारण भुक्तानी हुन बाँकि रहेको एमसिए नेपालले जनाएको छ ।
मिलेनियम च्यालेन्ज एकाउन्ट नेपाल विकास समिति (एमसिए–नेपाल) अन्तर्गत बन्ने प्रशारणलाईनका लागी टावर निर्माण गर्न जग्गाको अवस्था हेरिकन प्रतिकठ्ठा ९ लाख १४ हजार देखि ७३ लाख ६७ हजार सम्म रकम भुक्तानी गरिएको छ । साना ठुला दुई प्रकारका टावर निर्माणका लागि १ कठ्ठा ८ धुर देखि २ कठ्ठा सम्म जग्गा अधिग्रहण गरिएको छ ।

लप्सीफेदिबाट सुरु हुने ३ सय १५ किलोमिटर लामो प्रशारण लाईन अन्र्तगत नवलपरासीमा बर्दघाट वडा नम्बर २ को जंगल क्षेत्र हुँदै सुनवल ११ बाट रामग्राम हुदै पाल्हीनन्दनबाट भारत तर्फ जोडिने छ । नवलपरासीमा प्रशारण लाईन ३३ किलोमिटर लामो हुने छ । नवलपरासीमा कुल १ सय २ वटा टावर निर्माण हुने छ । जसमध्ये सुनवल सूर्यबस्तीमा रहेको सवस्टेशन देखि पाल्हीनन्दन सम्म कुल १८ दशमलव २ किलोमिटरमा बन्ने ५४ वटा टावरको मात्र मुआब्जा वितरण भएको हो । टावर रहने स्थानको मुआब्जा टुंगो लागेर वितरण भईरहेपनि तारमुनीको जग्गाको भने क्षतिपुर्ति मुल्याकंन हुन बाँकि छ । तारमुनीको जग्गाको सन्र्दभमा एमसिए नेपालले क्षतिपूर्ति उपलब्ध गराउने छ । जसका लागी सहायक प्रमुख जिल्ला अधिकारीको संयोजकत्वमा मूल्यांकन समिति बनेको छ । उक्त समितिले ३५ दिन भित्र तारमुनीको जग्गाको मुल्याकंन गरी क्षतिपुर्ति सिफारिस गर्ने प्रमुख जिल्ला अधिकारी स्कीम श्रेष्ठले बताईन् ।

यसैबिच तारमुनीको जग्गाको मुल्याकंन नहुदै जग्गाधनिहरू भने जग्गाको क्षतिपूर्ति नभई मुआब्जा पाउनुपर्ने भन्दै स्थानीय तहमाथी दबाब सृजना गर्न थालेका छन् । किसान संर्घष समिति बनाएर हाईटेन्सन लाईनको तारमुनि जग्गा पर्ने जग्गाधनिहरूले टावरको जग्गा जस्तै आफुहरूले पनि पुरा क्षतिपूर्ति पाउनुपर्ने माग गरेका हुन् । रामग्राम नगरपालिकामा जनप्रतिनिधि सहितको टोली संग भएको छलफलमा जग्गाधनिहरूले तारमुनीको जग्गाको उपयोगिता नहुने भन्दै क्षतिपुर्ति नभए मुआब्जा दिनुपर्नेमा माग गरेका हुन् ।संघर्ष समितिका अध्यक्ष मनोज मौर्यले स्थानिय तहका जनप्रतिनिधिले यसमा भूमिका खेल्नुपर्ने भन्दै उचित क्षतिपुर्ति पाउनुपर्ने माग गरे । सो क्रममा नगर प्रमुख धनपत यादवले जग्गाको उचित क्षतिपुर्ति पाउनुपर्ने भन्दै आफु जनताको पक्षमा रहेर मुआब्जा निर्धारण समितिमा कुरा उठाउँदै आएको बताए । खनजोत गर्दे आएको र त्यहि जग्गाको भरमा जिविकोपार्जन गर्दे आएका किसानहरू मारमा पर्ने विषयमा आफू जानकार रहेको बताउँदै नगर प्रमुख यादवले बढि भन्दा बढि क्षतिपूर्तिका लागी पहल भईरहेको बताए । सबै तहका जनप्रतिनिधिहरू यसमा जिम्मेवार बन्नुपर्ने र जग्गाधनिलाई पनि सचेत बन्न नगर प्रमुख यादवले आग्रह गरे ।
बर्दघाटदेखि पाल्हीनन्दनसम्म विस्तार हुने प्रशारण लाईनको तारमुनि ९ सय ५० जनाको जग्गा पर्ने बताईएको छ ।