खोज

बुटवल ।

लायन्स क्लव अफ बुटवल सयपत्रीले माघ ३० गते एक दिने खाना महोत्सव सम्पन्न गरेको छ।

यो कार्यक्रम सडक बालबालिका, अपांग र वृद्धवृद्धाका लागि सहयोग जुटाउने उद्देश्यले आयोजना गरिएको थियो र समाजका पछाडि परेको वर्गको सहयोगमा क्लवको निरन्तर प्रतिबद्धता र समर्पण रहेको क्लवका अध्यक्ष कमला बस्नेत कुँवरले जानकारी दिइन्। बुटवल उपमहानगरपालिका वार्ड नं. ९ को तिनकुने चोकमा नेपाली संस्कृतिका परिकारहरूको संरक्षण गर्दै कार्यक्रमको आयोजना गरिएको थियो।

लायन्स क्लवको प्रमुख उद्देश्य समाजमा सुधार ल्याउनु, रचनात्मक कार्यहरू मार्फत विभिन्न वर्गका व्यक्तिहरूसम्म सहयोग पुर्याउनु र समग्रमा मानवताको लागि काम गर्नु रहेको लायन्स डिष्टिक ३२५ पि का कोचिफ तथा क्लवका पूर्व अध्यक्ष सुनिता बजमिय बताइन्।

कार्यक्रममा संस्थापक अध्यक्ष प्रतिभा श्रेष्ठ, पूर्व अध्यक्षहरू सिर्जु श्रेष्ठ ,रोशनी पाण्डे, सृजना श्रेष्ठ, उपाध्यक्ष एली क्षेत्री, मिनु श्रेष्ठ, सचिव शान्ती लक्ष्मी अर्याल लगायत लायन्स क्लवका सदस्यहरू उपस्थित थिए।

कार्यक्रमको संयोजन निना श्रेष्ठले गरेकी थिइन्। यस महोत्सवमा नेपाली संस्कृतिका परिकारहरूको संरक्षण गर्दै यसको महत्त्वलाई जनचेतना बढाउने काम पनि गरिएको संस्थापक अध्यक्ष प्रतिभा श्रेष्ठले बताइन्। अध्यक्ष कुँवरका अनुसार, यस महोत्सवबाट प्राप्त रकम सडक बालबालिका, अपांग र वृद्धवृद्धाहरूको सहयोगमा प्रयोग गरिनेछ।

लायन्स क्लव अफ बुटवल सयपत्रीले यस्तो कार्यक्रममार्फत सामाजिक उत्तरदायित्वको दायित्व पूरा गर्दै, नेपाली संस्कृति र समाजका अपहेलित वर्गको जीवनस्तर उकास्नमा योगदान पुर्याउँदै आएको पूर्व अध्यक्ष रोशनी पाण्डेले बताइन्।