खोज

अनेक आशंका चिर्दै भैरहवास्थित गौतमबुद्ध अन्तर्राष्ट्रिय विमानस्थलमा अन्तर्राष्ट्रिय उडान बढ्दै गर्दा यो विमानस्थलले फेरी खुसी ल्याउने आधार एवं विश्वास सिर्जना भएको छ । हुस्सु तथा कुहिरोको कारण भिजिबिलिटी कम भएको भन्दै उडान स्थगित गरेका अन्तर्राष्ट्रिय विमान कम्पनीहरूले पुनः उडान सञ्चालन गर्न थालेपछि गौतमबुद्ध अन्तर्राष्ट्रिय विमानस्थलमा यात्रुहरूको चहलपहल बढ्न थालेको छ । यसले समग्र लुम्बिनी प्रदेशका जनतालाई खुसी बनाएको छ । गौतमबुद्ध अन्तर्राष्ट्रिय विमानस्थल नियमित सञ्चालन भएमा मात्रैपनि समग्र लुम्बिनी क्षेत्रको पर्यटन विकासमा ठूलो टेवा पुग्ने विश्वास सिर्जना हुन्छ । त्यसमाथि जाडो सकिएर हिउँदै लाग्दै गर्दा कटौती भएका अन्तर्राष्ट्रिय उडान पुनः सञ्चालन हुनु यस क्षेत्रको लागि खुसीको कुरा हो । यसले लुम्बिनी क्षेत्रको पर्यटनमा मात्रै होइन, आर्थिक गतिविधिमा समेत टेवा पुग्ने विश्वास गरिएको छ । भिजिबिलिटीको कारण देखाउँदै कतार एयरवेज, जजिरा एयरवेज, फ्लाई दुबई र थाई एयर एसियाले मंसिरको अन्तिम सातादेखि स्थगित गरेको अन्तर्राष्ट्रिय उडान मौसममा खुल्न थालेपछि पुनः सुरू गरेका छन् । यसबाट यो विमानस्थल अव सञ्चालनमा समस्या छैन भन्ने पनि प्रमाणित गरेको छ । यद्यपि कतार एयरवेजले भने अझै उडान सञ्चालन गरेको छैन । नेपालका श्रमिकहरूको प्रमुख गन्तब्य मानिएको कतारले समेत भैरहवाबाट अन्तर्राष्ट्रिय उडान सुरु गर्ने प्रतिवद्धता जनाएकोले अव गौतमबुद्ध अन्तर्राष्ट्रिय विमानस्थल सञ्चालनमा कुनैपनि बाधा र अडचन छैन भन्ने प्रमाणित भएको छ ।

गौतमबुद्ध अन्तर्राष्ट्रिय विमानस्थलमा चहलपहल बढ्न थालेको मात्र छैन, दैनिक अन्तर्राष्ट्रिय उडानले अव काठमाण्डौंको विकल्प भैरहवाले दिनसक्छ भन्ने प्रमाणित पनि गरेको छ । अन्तर्राष्ट्रिय उडानसंगै भैरहवाबाट उडने र स्वदेश फर्किने यात्रुहरूको संख्या समेत बढ्दै गएकोले यो विमानस्थल अव सञ्चालन हुँदैन कि भन्ने भ्रम समाप्त भएको छ । अवको दिनमा सरकारले विमानस्थल संचालन गर्न आवश्यक पर्ने पूर्वाधार, भिसा सेन्टर, श्रम, मेडिकल लगायतका सुविधा भैरहवाबाटै सुरु ग¥यो भने सुनमा सुगन्ध हुनेछ । अर्को खुसीको कुरा के छ भने गौतमबुद्ध अन्तर्राष्ट्रिय विमानस्थलमा कम भिजिबिलिटी हुँदा पनि जहाज उडान र अवतरण गर्न सकिने रिक्वायर्ड नेभिगेसन पर्फर्मेसन–अथोराइजेसन रिक्वायार्ड (आरएनपी–एआर) प्रणाली लागू गरिएको छ । यो प्रणाली लागू भएपछि अव कम भिजिबिलिटी हुँदा पनि जहाज अवतरण गराउन सकिने भएकोले गौतमबुद्ध अन्तर्राष्ट्रिय विमानस्थलले खुसी लिएर आएको छ । यो विमानस्थलबाट भारतसंग सिधा एयर रुट छैन । भारतले आकास उपलब्ध नगराउँदा अनिश्चयको वातावरण सिर्जना हुन सक्छ तर निकट भविष्यमै भारतले सिधा रुट दिने आश्वासन दिएको छ । भारतले एयर रुट दिएको अवस्थामा यो विमानस्थल एउटा भरोसायोग्य विमानस्थल बन्ने छ । नेपाल सरकारले भारतले एयर रुट दिने विश्वास गरेको छ । त्यसमा भारतमाथि कुटनीतिक दवाव र पहल दुबै बढाउनेतर्फ पहल गर्न ढिलाई गर्नु हुँदैन । जेहोस भैरहवाको गौतमबुद्ध अन्तर्राष्ट्रिय विमानस्थललाई अहिलेको भन्दा धेरै अन्तर्राष्ट्रिय उडानमार्फत जसरीपनि सफल बनाउने विषयमा सरकार, यस क्षेत्रका पर्यटन व्यवसायी र आम जनता सवैको ध्यान जाओस् ।

यो विमानस्थललाई त्रिभुवन विमानस्थलको विकल्पको रूपमा पनि हेरिएको छ । सरकारले कुनै आकस्मिक कारणबस त्रिभुवन विमानस्थल बन्द गर्नुपर्ने अवस्थामा देशको एकमात्र बैकल्पिक विमानस्थलको रूपमा यसलाई त्यही मोडेलमा विकास गर्नु जरुरी छ । अवको दिनमा विदेश जाने नेपालीले भैरहवाबाटै अन्तर्राष्ट्रिय उडानको सेवा पाउने र लुम्बिनी भ्रमणमा आउने विदेशी पर्यटकले समेत लुम्बिनी गन्तब्य बनाएर यहीँबाट उडान अवतरणको भरपर्दो सुविधा पाए भने लुम्बिनी प्रदेशका लागि ठूलो गौरवको बिषय हुनेछ । पछिल्लोसमय उडान रोकेका अन्तर्राष्ट्रिय बायुसेवा कम्पनीहरूले उडान सुरु गरेपछि उडानको बिषयमा सिर्जना भएका अनेक आशंका र भ्रम समाप्त भएको छ । गौतमबुद्ध विमानस्थलबाट अन्तर्राष्ट्रिय उडान रोकिँदा निजी क्षेत्र निराश हुँदै गरेको अवस्थामा उडान सुरु भएको सुखद समाचारले सवैलाई उत्साहित वनाएको छ । अवको दिनमा कुनैपनि मानेमा अन्तर्राष्ट्रिय उडान रोकिने वातावरण सिर्जना नहोस् ।