खोज

चन्द्रौटा(कपिलवस्तु), १९ माघ ।

लुम्बिनी प्रदेशका भौतिक पूर्वाधार मन्त्री भुमिश्वर ढकालले महिलामैत्री नीति मन्त्रालय बनाउन सरकार प्रतिबद्ध रहेको बताएका छन् । मन्त्रालयमा महिलाको सहभागिता सुनिश्चित गरिएको संसदमा समानुपातिक र प्रत्यक्ष निर्वाचित सांसदबीचको विभेदबारे छलफल भइरहेको उनले उल्लेख गरे ।

कपिलवस्तुको शिवराज नगरपालिका–५, चन्द्रौटामा आयोजित दलित महिला महासंघ नेपालद्वारा आयोजित अन्तरक्रिया कार्यक्रमलाई सम्बोधन गर्दै मन्त्री ढकालले यस्तो बताएका हुन् । मन्त्रालय सम्हालेपछि हरेक क्षेत्रमा महिलाको अधिकारलाई संस्थागत गर्दै सहभागितामा विशेष जोड दिएको उनले बताए । भेदभाव अन्त्य गर्दै समाजलाई सहज रूपमा अगाडि बढाउन आवश्यक रहेको बताउँदै समावेशीता बढाउन ढकालले प्रतिबद्धता समेत जाहेर गरे ।

यसैबीच कार्यक्रममा लुम्बिनी प्रदेश सभा सदस्य भगवती घिमिरेले महिला सहभागितासहितका नीति निर्माण भए पनि कार्यान्वयन फितलो रहेको बताईन् । कतिपय कार्यक्रम कार्यान्वयन चरणमा पुगे पनि हालको सरकारले तिनलाई अघि बढाउन नसकेको गुनासो गरिन् । त्यसैगरी, प्रदेश सभा सदस्य निर्मला चौधरीले महिला मैत्री कार्यक्रम निर्माणमा सरकार गम्भीर हुनुपर्ने धारणा राखिन् ।

यस्तै दलित महिला महासंघकी अध्यक्ष विमला बिकले अन्य मन्त्रालयहरूमा भन्दा भौतिक पूर्वाधार मन्त्रालयमा महिलाको सहभागिता उल्लेखनीय देखिएको बताईन् । महासंघले ६ महिनासम्म विभिन्न कार्यक्रम सञ्चालन गरी महिलाको सहभागिता सुनिश्चित गर्न केन्द्रित रहेको उनले जनाईन् ।

प्रदेश सरकारको योजना तथा बजेट तर्जुमा प्रक्रियामा महिलाको सहभागिताका सन्दर्भमा गहन छलफल गरिएको जनाइएको छ । लुम्बिनी प्रदेश सभा सदस्य दिपा खड्का, सचिव भिर्माजुन पाण्डे, मानव अधिकारकर्मी मिना परियारले लगायतले बिहीबार कार्यक्रमलाई सम्बोधन गरेका थिए ।