खोज

दाङ, १२ माघ ।

जिल्लामा ३९ हजारभन्दा बढी किशोरीलाई पाठेघरको मुखको क्यान्सरविरूद्धको (एचपिभी) खोप लगाइने भएको छ । यही माघ २२ देखि फागुन ६ गतेसम्म १० देखि १४ वर्ष उमेर समूहका किशोरीलाई क्यान्सरविरूद्धको खोप लागाइने स्वास्थ्य कार्यालय दाङका खोप फोकल पर्सन भानु ज्योति वलीले जानकारी दिए ।

उनका अनुसार विद्यालयमा पुगेर कक्षा ६ देखि १० सम्म अध्ययनरत किशोरीहरुलाई खोप लगाइने छ । विद्यालय बाहिर रहेका १० वर्षदेखि १४ वर्ष उमेर समूहका किशोरीहरूलाई पनि खोप लगाइने छ । उनका अनुसार जिल्लाका १० स्थानीय तहका ३९ हजार चार सय ५० जना किशोरीलाई खोप लगाउने तयारी भइरहेको छ ।

विद्यालयमा अध्ययनरत ३७ हजार दुई सय पाँच जना र विद्यालय बाहिर रहेका दुई हजार दुई सय ४५ जना गरेर ३९ हजार चार सय ५० जना बालिका तथा किशोरीलाई खोप लगाउन थालिएको फोकल पर्सन वलीले जानकारी दिए ।

उनका अनुसार खोप लगाउनका लागि पालिकास्तरमा जनशक्ति तयार गर्न स्वाथ्यकर्मीलाई तालिम दिइरहेको जानकारी दिए ।

एचपीभी खोप भनेको पाठेघर मुखको क्यान्सरविरुद्ध लगाउने खोप हो । नेपाली महिलामा सबैभन्दा धेरैयो क्यान्सर देखिएको घोराही उपमहानगरपालिका जनस्वास्थ्य प्रबर्दन शाखा प्रमुख राधा पौडेलले जानकारी दिइन् ।

उनले भनिन्, सबैभन्दा धेरै महिलाहरुको मृत्युको कारक पनि यही क्यान्सर हो । औसतमा पनि दैनिक चार जनाको मृत्यु भइरहेको छ । यो अवस्थालाई निवारण गर्न खोप अपरिहार्य छ । स्वास्थ्य मन्त्रालयले विद्यालयकेन्द्रित अभियान संचालन गरेर कामको थालनी गरेको छ । यसमा ६ देखि १० कक्षाका किशोरीलाई खोप लगाउँदै छौँ ।

यो खोप १० देखि १४ वर्ष उमेरका किशोरीलाई लगाइनेछ । यसले भविष्यमा हुने पाठेघर मुखको क्यान्सर न्यूनीकरण गर्छ । एपीभी भनेको भाइरस हो । यसमा दुई सयभन्दा बढी प्रजातिका भाइरस छन् । त्यसमध्ये क्यान्सर गराउने भाइरस थोरै छन् । तीमध्ये पनि १६ देखि १८ प्रजातिका भाइरसले क्यान्सर गराउँछन् ।