खोज

सुर्खेत, ९ माघ ।

कर्णाली प्रदेशको राजधानी वीरेन्द्रनगर नगरपालिकाले पञ्चवर्षीय योजना निर्माण गर्न लागेको छ । पूर्वाधार विकास, स्वास्थ्य, कृषि, शिक्षा र ऊर्जालाई प्रमुख प्राथमिकतामा राखेर योजना निर्माण गर्न लागेको हो । पूर्वाधार विकासलाई एकीकृत गर्नेगरी योजना निर्माण गर्न लागेको नगरपालिकाले जनाएको छ ।

विकास साझेदार संघ संस्थासँग मिलेर पञ्चवर्षीय योजना निर्माण गर्न लागिएको नगरपालिकाका प्रमुख मोहनमाया ढकालले जानकारी दिइन् । योजनावद्ध विकास निर्माणका लागि पञ्चवर्षीय योजनाको आवश्यकता अनुभूति भएको ढकालले बताइन् । अब बन्ने योजनाका विषयमा विभिन्न क्षेत्रसँग छलफल गरिने उनको भनाई छ । योजना निर्माणका लागि विभिन्न चरणमा विभिन्न क्षेत्रका विज्ञहरूसँग छलफल गरिने ढकालले जनाइन् । नगरपालिकाका लागि बढ्दो जनसंख्या चुनौतीका रूपमा रहेको छ ।

त्यसकारण भविष्यमा उत्पन्न हुनसक्ने जोखिमलाई नियन्त्रण गर्नेगरी पञ्चवर्षीय योजना निर्माण गर्न लागिएको नगरप्रमुख ढकालको भनाई छ । उनले भनिन्, ‘अब बन्ने योजनाले पूर्वाधार विकास, कृषि, स्वास्थ्य, शिक्षा र जलस्रोतको क्षेत्रमा कसरी काम गर्न सकिन्छ भनेर मार्गदर्शन गर्नेछ, त्यसैका लागि योजना निर्माण थालेका छौँ ।’ पञ्चवर्षीय योजना निर्माणका लागि सुरुवाती चरणको छलफल भइरहेको उनको भनाइ छ ।

विभिन्न क्षेत्रमा अध्ययन गरेका विज्ञहरूबाट अध्ययन गराएर मात्र योजना निर्माण गरिनेछ । आगामी वर्षसम्म पञ्चवर्षीय योजना निर्माण गरिसक्ने गरी छलफल अघि बढाइएको नगरपालिकाले जनाएको छ । द एशिया फाउन्डेसनले नगरपालिकाको पञ्चवर्षीय योजना निर्माणमा सहयोग गर्नेछ । उक्त संस्थाले योजना निर्माणका लागि सुरुवाती चरणका काम गरिरहेको नगरपालिकाले जनाएको छ ।