खोज

सुनवल, ८ माघ ।

पश्चिम नवलपरासीको सिमावर्ती नाका हँुदै भारततर्फ तस्करीका लागि ल्याइएको आशंकामा प्रहरीले सुनवलबाट समानसहितको एक ट्रक नियन्त्रणमा लिएको छ । सुनवल चोकबाट प्रहरीले आइतबार लु २ ख ८९३ नम्बरको लसुन र मकै लोड गरिएको ट्रक नियन्त्रणमा लिएको जिल्ला प्रहरी कार्यालय पश्चिम नवलपरासीले जनाएको छ ।

बुटवलबाट नवलपरासीको प्रतापपुरमा भण्डारणका लागि ल्याउँदै गरेको अवस्थामा प्रहरीले पुर्व पश्चिम राजमार्गको सुनवल बजार क्षेत्रबाट नियन्त्रणमा लिएको हो । सो ट्रकमा १ सय ३२ बोरा (३९८० किलो) लसुन र ६ सय ८० बोरा (१७ हजार किलो) मकै रहेको थियो । उक्त समानको विषयमा थप अनुसन्धानका लागि राजश्व अनुसन्धान कार्यालय बुटवल पठाइएको छ । प्रहरीले उक्त सामग्री भारततर्फ तस्करी गर्न सिमावर्ती क्षेत्रमा भण्डारणका लागि ल्याएको आशंकामा नियन्त्रणमा लिएको हो ।

सिधै भारततर्फ तस्करीका लागि सेटिङ नमिल्दा तस्करहरुले विभिन्न स्थानमा गोदाममा भण्डारण गरेर चाईनिज लसुन, मकै लगायतका सामग्री भारततर्फ तस्करी गर्दै आएका छन् । तर पछिल्लो समय प्रहरीले केही कडाई गरेपछि भने तस्करहरु सेटिङ मिलाउन शक्तिकेन्द्र धाउन थालेको स्रोतले जनाएको छ । अहिले कागजपत्र भएपनि सिमावर्ती क्षेत्रमा भण्डार गर्न लागिएको लसुन, मकै लगायतका सामग्री फेला परेपछि प्रहरीले सिधै राजश्व अनुसन्धान कार्यालय बुटवल पठाउने गरेको छ । राजश्व अनुसन्धान कार्यालय बुटवलका सूचना अधिकारी मनोज कुमार शैनीले सामान र पक्राउ परेका समानको बिलविजक सहित फर्मको विषयमा थप अनुसन्धान भइरहेको जानकारी दिए ।

पछिल्लो समय तस्करको गिरोहले कागजपत्र भएको समान किन नियन्त्रणमा लिएको भन्दै प्रमुख जिल्ला अधिकारी सहित सुरक्षा निकायलाई दबाब दिन थालेका छन् । प्रहरीले भिसिटिएस सहितका सवारी नियन्त्रणमा लिएर राजश्व अनुसन्धानमा पठाउन थालेपछि तस्करको समूह तनावमा परेको छ । सिमा क्षेत्रमा फर्म खोलेर भण्डारण गर्ने र क्रमैसंग सानो परिमाणमा भारततर्फ रातको समयमा पठाउने काम विगत देखि हुँदै आएको थियो ।

अहिले पनि भारतबाट विभिन्न सामान अवैध रुपमा आयात हुने क्रम छिटफुट् जारी नै छ । भने यस क्षेत्रबाट पनि भारततर्फ सानो परिमाण बनाएर सामान तस्करी हुने गरेको छ । लुम्बिनी प्रदेश प्रहरी प्रमुख डिआईजी दानबहादुर कार्कीले कडाई गरेपछि अहिले प्रहरीले समान नियन्त्रणमा लिएर राजश्व अनुसन्धान कार्यालय पठाउने गरेको छ । यसअघि मिलेमतो र चोरीनिकासी गरेर विभिन्न समानको तस्करी हुँदै आएको थियो । भारतमा धेरै माग भैरहेको लसुन नेपालमा चीनबाट आइरहेको छ । त्यस्तै अर्जेन्टिना, टर्की, ब्राजिल, दक्षिण अफ्रिकाबाट मकै धेरै आयात भैरहेको छ । यसरी आयात भएको लसुन र मकै थोरै मात्रामा नेपालमा पनि खपत हुन्छ भने अधिक मात्रामा भारतमा पुर्याइने गरेको छ ।