खोज

गुल्मी, २८ पुस ।

गुल्मीमा शताब्दी पुरुष पर्शुराम पन्थीको १०४ वर्षको उमेरमा निधन भएको छ । रेसुङ्गा नरपालिका –९ स्थीत उपल्लो तम्घास निवासी कान्छा पण्डीतको नामले परिचित उहाँको शुक्रबार राती निधन भएको हो ।

लामो सयमदेखि रेसुङ्गाको संस्कृति, संरक्षण र आध्यात्मीकताको क्षेत्रमा काम गर्दै आएका पन्थीको शुक्रबार राती अचानक निधन भएको हो । भारताको बनारसबाट मध्यमासम्म अध्ययन गरेका पन्थीले एक हजार भन्दा बढी ठाउमा सप्ताह र पुराण बाचन गरेका थिए । पन्थीले मोहन शम्सेर र जुद्ध शम्सेरको घरमा समेत पुगेर सप्ताह समृत गरेकोे जानकारहरू बताउँछन ।

पहिलो जन निर्वाचित प्रधानमन्त्री विपी कोईराला र गणेशमा सिंह भ्रमणको शिलसिलामा गुल्मी आउँदा तम्घास स्थीत पन्थीकै घरमा बसेका थिए । रेसुङ्गामा तपस्या गरि बसेका स्वामी यदुकानन्दको देहवसानपछि पन्थीकै नेतृत्वमा लामो समयसम्म रेसुङ्गामा दैनीक पुजाआजा हुने गर्दथ्यो ।

रेसुङ्गाको नाममा गुठी धेरै भएको र उक्त गुठी अर्घाखाँचीमा रहेको हुँदा स्थानीयले आफ्नो नाममा भोगचलन गर्न थालेपछि उनले गुठीको संरक्षणका लागि मुद्दा लडेर उक्त गुठी फिर्ता गराउन महत्वपुर्ण भुमिका निर्वाह गरेका थिए । मध्यम परिवार, सरल खानपिन, सादगी जीवन शैली र ध्यान साधनामा लाग्नु भएका पन्थी अन्तिम समयसम्म पनि स्वस्थ थिए । शुक्रबार राती खना खाएर परिवारसँग कुरा गर्दागर्दैैको अबस्थामा उनको निधन भएको नाती शुदर्सन खनालले जानकारी दिएका छन ।

नेपाली काँग्रेसका केन्द्रिय सदश्य एवं गुल्मी क्षेत्र नं १ का सांसद डा.चन्द्र भण्डारीले उनकोे निधनले आफुलाई स्तब्ध र मर्माहत बनाएको बताएका छन । सामाजिक सञ्जाल मार्फत श्रद्धाञ्जली अर्पण गर्दै भण्डारीले पन्थीले नेपाली समाज, संस्कृति र धार्मिक क्षेत्रलाई दिएको योगदान र ज्ञानको सदैब स्मरणीय रहने भन्दै शोकाकुल परिवारजनमा समवेदना प्रकट गरेका छन् ।

बुवा हरिलाल पन्थीका पाँच भाइ छोरा र चार छोरीहरू मध्य उनी कान्छा छोरा हुन । उनकोे पार्थिव शरिरमा प्रदेश सभा सदस्य डिल्लीराज भुसाल, नेपाली काँग्रेस लुम्बिनी प्रदेश उपसभापति भुवनप्रसाद श्रेष्ठ लगायत जिल्ला स्थीत विभिन्न राजनीतिक दल एवं संघ सस्थाका व्यक्तिहरूले श्रद्धाञ्जली अर्पण गरेका थिए । शताब्दी पुरुष पन्थीको हिन्दु बैदिक परम्परा अनुसार सनिबार रिडी स्थीत कालीगण्डकीमा अन्त्यष्टी गरिएको छ ।