खोज

बुटवल, २७ पुस ।

प्रेस चौतारी नेपाल रुपन्देहीको आठौं जिल्ला अधिवेशन आगामी माघ २४ गते हुने भएको छ । शनिबार सम्पन्न चौतारी रुपन्देहीको जिल्ला सचिवालय बैठकले २०८१ माघ २४ गते बुटवलमा अधिवेशन गर्ने निर्णय गरेको जिल्ला अध्यक्ष लक्ष्मण पौडेलले बताए ।

बैठकले प्रेस चौतारीको स्थापना दिवसको अवसरमा आगामी माघ २२ गते बुटवलमा रक्तदान कार्यक्रम आयोजना गर्ने तय गरेको अध्यक्ष पौडेलले जानकारी दिए । अध्यक्ष पौडेलका अनुसार जिल्ला अधिवेशनका दिन प्रेस चौतारी परमानन्द खरेल स्मृति पत्रकारिता पुरस्कार वितरण गरिनेछ । जसका लागि चौतारीका पूर्व केन्द्रीय सदस्य तथा पुर्व जिल्ला अध्यक्ष शेरबहादुर केसीको संयोजकत्वमा तीन सदस्यीय पुरस्कार छनौट समिति गठन गरिएको छ । समितिको सदस्यहरुमा चौतारीका पूर्व केन्द्रीय सचिव भरत के.सी.र पूर्व केन्द्रीय सदस्य कुलमणि ज्ञवाली रहेका छन् ।

बैठकमा प्रेस चौतारी नेपालका केन्द्रीय सचिव प्रदीप आचार्यले जिल्ला अधिवेशनलाई सफलतापूर्वक सम्पन्न गर्न तयारी तीव्रताका साथ अगाडि बढाउन आग्रह गरे ।

बैठकमा केन्द्रीय सदस्य तथा जिल्ला इञ्चार्ज अमृत गिरी, नेकपा (एमाले) प्रचार विभागका पूर्व सचिव नरेश के.सी., प्रेस चौतारी रुपन्देही जिल्ला उपाध्यक्ष भगवती पाण्डे, कोषाध्यक्ष दिनेशकुमार श्रेष्ठ, सहसचिव रविन्द्र गुप्ता, जिल्ला सचिवालय सदस्य डि.बी सुस्लिङ, अस्मिना पाण्डे लगायतले भनाइ राखेका थिए ।

जिल्ला अधिवेशनको अवसरमा प्रकाशन गरिने स्मारिकाका लागि चौतारीका केन्द्रीय सदस्य तथा जिल्ला इञ्चार्ज अमृत गिरीको संयोजकत्वमा गठित स्मारिका प्रकाशन उपसमितिले तयारी गरिरहेको अध्यक्ष पौडेलले बताए ।