खोज

बुटवल २३ कात्तिक ।

रुपन्देही क्षेत्र नं १ का प्रतिनिधिसभा सदस्य पदका उम्मेदवार घनश्याम भुसालले मतदाताहरुलाई त्रिभुज चुनाव चिन्हमा मत दिन अनुरोध गरेका छन् ।

भुसालले आफुले आज सम्म कहिल्यै पनि ईमान्दारितालाई दाउमा नलगाएको भन्दै भ्रष्टाचारको अन्त्य आफनो लक्ष्य भएको बताए । उनले भने–“जनताले तिरेको कर राज्यको ढुकुटी हो र त्यो ढुकुटी कहाँ खर्च गर्ने र कहाँ नगर्ने यही चुनावले निर्धारण गर्ने गर्छ । म मेरो राज्यको ढुकुटी निजी लाभको लागि कुनै पनि हिसावले दुरुपयोग गर्दिन ।”

जुन इमान्दारिता जनप्रतिनिधिमा हुनुपर्छ त्यो आफुमा भएको भन्दै उनले जनताले यसपटक सही उम्मेवारलाई जिताउने कुरामा आफु ढुक्क रहेको बताए । “हामी आफै आफैमा लड्छौ र मुलुक बर्बाद हुन्छ । संविधान, कानुन र लोकतन्त्रको रक्षा गर्नु जनप्रतिनिधिकै काम हो”–भुसालले भने । उनले आफु हिजो पनि संविधानको रक्षाको लागि पनि लडेको र भोलि पनि संविधान र परिवर्तनले संस्थागत गरेको व्यवस्थाको रक्षाको लागि लड्ने प्रतिबद्धता व्यक्त गरे । उनले यस क्षेत्रका पालिका, पार्टी, आमा समूह, क्लबहरू, बुद्धिजिवी, उद्योगपति, व्यवसायी, किसान, मजदुर सबैलाई मिलाएर लिएर जान सकियो भने र यस क्षेत्रमा आउने स्रोत साधनहरुको राम्ररी प्रयोग गरेर काम गर्न सके समग्र विकास संभव हुने भन्दै भुसालले विकास कार्यलाई बजेटको अभाव हुन नदिने बताए ।