खोज

बुटवल, १४ पुस । सौन्दर्य विधामा उदयमान युवाहरुलाई प्रोत्साहन गर्ने उदेश्यका साथ बुटवलमा आयोजना भएको राईजिङ मेकअप आर्टिस्ट बुटवलको उपाधि ममता रानाले जितेकी छिन । बुटवलमा जारी औद्योगिक व्यापार मेलाको व्युटी फेयर २०८१ अन्तरगत आईतबार सम्पन्न सौन्दर्य तथा संस्कृति प्रदर्शनमा उत्कृष्ट हुदै फिनालेमा इरुम ब्यूटी पार्लरकी रानाले उपाधि चुमेकी हुन । उपाधिसँगै उनले नगद २० हजार पुरस्कार राशी हात पारेकी छन् । उत्कृष्ट १२ जना मेकअप आर्टिस्ट बिच फिनालेमा रानाले मगर संस्कृति झल्कने पहिरन र भेषभुषामा प्रस्तुत भईकी थिईन ।

फस्र्ट रनरअप बन्न सफल सेजल व्युटीहोमकी सेजल प्रधान भने नगद १० हजार रुपैयामा चित्त बुझाईन । लुमी व्युटी होमकी दिपु शाही सेकेण्ड रनरअप बन्दै नगद ५ हजार रुपैयाबाट पुरस्कृत भईन । प्रतियोगितामा मेकप आर्टिस्टहरु श्रेया केसी, फेसन डिजाइनर अनुपा श्रेष्ठ र सामाजिक अभियन्ता कल्पना शिवाकोटीले जुरी मेम्बरको भूमिका निर्वाह गरेका थिए ।

तिलोत्तमा नगरपालिकाको आर्थिक सहयोगमा आयोजना गरिएको व्युटी फेयर २०८१ मा निःशुल्क परामर्श, महिला उद्यमीलाई प्रवद्र्धन, हस्तकलाका सामग्रीहरु बिक्री लगायतका स्टलहरु राखिएको महिला उद्यमी तथा व्युटी फेयर संयोजक रेनु श्रेष्ठले बताईन । बुटवल मेलामा काठमाडौंपछि पहिलो पटक व्युटी फेयरको आयोजना गरिएको संयोजक श्रेष्ठले दाबी गरिन । व्युटी फेयरमा सौन्दर्य कलामा लागेका महिलाहरुका उद्यम तथा अन्य महिला उद्यमीहरुलाई समेत जोडेर १६ वटा स्टलमा उनीहरुको उत्पादनहरु राखिएका छन् ।

मेला घुम्न आउने दर्शकलाई मनोरञ्जनसँगै जीवन जिउने कला र ध्यानबारे समेत जानकारी गराउँदै आइएको व्युटी फेयरकी संयोजक श्रेष्ठले बताइन् । पेभेलियन अन्तरगत स्किन केयर, हेयर केयर र सौन्दर्यसंग सम्बन्धित विषयमा सेवासंगै विषयविज्ञले परामर्श समेत प्रदान गर्दै आएका छन् । यहाँ छाला, कपाल तथा नङ श्रृङ्गार तथा सजावटमा प्रयोग गरिने राष्ट्रिय तथा बहुराष्ट्रिय कम्पनीका उत्पादनहरु विक्रिका लागि राखिएका छन् ।