खोज

लुम्बिनी प्रादेशिक अस्पताल बुटवल प्रदेशकै गौरव वन्ने अभियानमा रहेको विगत बर्षहरूयताका यसका गतिविधिले स्पष्ट गर्दै आएको छ । अस्पतालको नेतृत्व गर्ने व्यवस्थापन समिति र अस्पताल प्रशासन तथा स्वास्थ्यकर्मीहरूको ऐक्यबद्धता हुने हो भने अस्पतालको सुधारमा ठूलो मद्दत पुग्ने अस्पतालको स्वास्थ्य सेवामा आएको परिवर्तन उदाहरण वनेको छ । त्यसैपनि यो अस्पताल नेपालकै ठूलो सरकारी अस्पताल बन्ने क्रममा अहिले निर्माणको काम भैरहेको छ । निर्माणको क्रमसंगै अस्पताललाई सुविधा सम्पन्न बनाउने अनि अस्पतालभित्र पूर्वाधार थप्दै जानेक्रम पनि चलिरहेको छ । सरकारी अस्पताल भन्ने वित्तिकै नाक खुम्च्याउने प्रवृत्ति कायमै छ तर यो अस्पतालमा सेवा लिन आउने सेवाग्राहीले भने उपचारपछि अस्पतालको प्रशंसा गर्ने गरेको उदाहरण प्रशस्तै छन् । अस्पतालको बहिरंग सेवामा भने विरामीको चापका कारण केही समस्या छ । दैनिक करिव पन्ध्रसयको संख्यामा आउने विरामीलाई सेवा दिनु आफैमा चुनौति हो । आगामी दिनमा बहिरंग सेवामा जनशक्ति थप गरेर विरामीले सहज उपचारको सुविधा पाउने अवस्था भयो भने यो अस्पताल प्रदेशकै गौरव गर्न लायक अस्पताल वन्ने निश्चित छ । अस्पतालको सेवा सुविधा थप्दै जानेक्रममा अस्पतालले आईतबारदेखि छुट्टै प्रसुती सेवा शल्यक्रिया कक्ष निर्माण गरी सेवा सुरु गरेको छ । अस्पतालले प्रसुति सेवाका लागि छुट्टै शल्यक्रिया कक्ष सञ्चालनमा ल्याएपछि अव सातै दिन प्रसुती सेवा शल्यक्रियाको सुविधा उपलब्ध हुने भएको छ । अस्पतालमा अव आठ शैयाको रिकभरी वार्ड तथा १५ शैयाको पोष्ट अपरेटिभ शैयासहित नयाँ प्रसुती शल्यक्रिया कक्ष सञ्चालनमा आउनु भनेको यस क्षेत्रका महिला दिदी बहिनीहरूले सेवा पाउनु हो । अव छुट्टै शल्यक्रिया कक्ष सञ्चालनसँगै प्रसुती सेवा थप गुणस्तरीय र सहज हुनेछ । यसले अस्पतालमा महिनौं पालो कुर्नुपर्ने अवस्थामा पनि सुधार हुने निश्चित छ । अस्पतालबाट बार्षिक ९ हजार बढी बिरामीले शल्यक्रिया सेवा लिँदै आएका छन् । अब प्रसुतीका लागि छुट्टै शल्यक्रिया कक्ष बनेपछि ३३ प्रतिशतले शल्यक्रिया सेवा वृद्धि हुनु खुसीको कुरा हो । अब बार्षिक १२ हजार बढीको संख्यामा शल्यक्रिया गर्न सकिने अस्पतालको भनाईले लुम्बिनी प्रादेशिक अस्पताल साँच्चैको गर्ब गर्न लायक अस्पताल वन्नेक्रममा छ भन्दा अत्युक्ति हुँदैन ।

अव अस्पतालले आन्तरिक जनशक्ति व्यवस्थापनका साथै उपकरणको व्यवस्थापनमा ध्यान दिने हो र अस्पतालका चिकित्सकका साथै स्वास्थ्यकर्मीहरूले होस्टेमा हैसे गर्ने हो भने यो अस्पताल हजारौं विरामीको आस्थाको केन्द्र बन्नेछ ।
लुम्बिनी प्रादेशिक अस्पताल सरकारको न्यूनतम सेवा मापदण्डमा धेरै पहिलेदेखि नै पहिलो बन्दै आएको छ । सरकारी अस्पताल गरिव, विपन्न र पहुँच बाहिरका विरामीको लागि आशा र भरोसाको केन्द्र हो । त्यो मात्र होइन सरकारी अस्पताललाई सवैको भरोसाको केन्द्र वनाइनुपर्दछ । तर, अझैपनि सरकारी अस्पतालको सेवाप्रति आम जनतामा विश्वासको वातावरण तयार नै हुन सकिरहेको छैन । तसर्थ सरकारी अस्पतालको सेवा प्रवाहमा कसले ध्यान दिने हो ? त्यहाँ भित्रको अवस्थाको अनुगमन कसले गर्ने ? भन्ने बिषयमा गंभीरता देखाउनु जरुरी छ । अव सरकारी अस्पतालको सुधारमा सरकारले नै प्राथमिकता दिनु जरुरी छ । प्रादेशिक अस्पताललाई जनशक्तिको हिसावले अझै सुविधा सम्पन्न बनाउनेतर्फ अस्पताल प्रशासनले आगामी दिनमा ध्यान दिनुपर्दछ । सेवाग्राही घण्टौं लाईनमा बस्नुपर्ने बाध्यता अन्त्य भयो भने अस्पतालको सेवामा चुस्तता आउने छ । सरकारी अस्पतालप्रति आम मानिसमा रहेको दृष्टिकोणमा परिवर्तन ल्याउन यो अस्पतालले नेतृत्वदायी भूमिका खेलोस् । प्रदेश सरकारले यो अस्पताललाई प्रदेशकै गौरवको आयोजना घोषणा गरेको छ । अव सेवाग्राहीले पनि त्यो महसुस गर्ने वातावरण तयार हुनुपर्दछ । सेवाग्राहीले सुलभरूपमा चिकित्सकीय सेवा पाउन सके भने निश्चितरूपमा यो अस्पतालले आफ्नो साख त बढाउने नै छ, अस्पतालका माध्यमबाट बुटवलको गरिमा समेत बृद्धि हुनेछ ।