दाङ, १० पुस ।
दाङको घोराहीमा जारी सातौँ संस्करणको घोराही मेयरकप रनिङ शिल्ड प्रतियोगिता अन्तरगत मंगलबार सम्पन्न ३ खेलमा वडा नम्बर १२ र १८ विजयी हुँदा वडा नम्बर २ र १० ले बराबरी खेलेका छन् ।
घोराही उपमहानगरपालिका वडा नम्बर १८ नवलपुर फुटबल मैदानमा लिग चरणका खेल अन्तरगत प्रतियोगिताको पाँचौँ दिनको पहिलो खेलमा वडा नम्बर १२ ले वडा नम्बर १९ लाई ७–१ गोल अन्तरले हराएको छ ।
वडा नम्बर १२ का लागि नवीन बुढाले ४ गोल गर्दा मनिष भारतीले २ र लक्ष्मण चौधरीले १ गोल गरे । वडा नम्बर १९ का लागि छबिलाल खड्काले १ गोल गरे । यो जितसँगै दुई खेलबाट वडा नम्बर १२ ले ३ अंक जोड्दै अन्तिम आठको सम्भावना जिवित राखेको छ भने वडा नम्बर १९ लगातार दुई हार व्यहोर्दै अंक विहिन छ ।
प्रतियोगिता अन्तरगत लिग चरणको बाह्रौं तथा मंगलबारको दोस्रो खेलमा वडा नम्बर २ र १० बिचको खेल १–१ गोलको बराबरीमा सकिएको छ । वडा नम्बर २ का लागि हिरा बिक र वडा नम्बर १० का लागि संगम चौधरीले १–१ गोल गरे । बराबरी खेलेका दुवै टीमले समान १–१ अंक बाँडेका छन् । यस्तै, लिग चरणको १३औँ खेलमा वडा नम्बर १८ ले वडा नम्बर ३ लाई १–० गोलले हराएको छ ।
पहिलो हाफको १८ मिनेटमा वडा नम्बर ३ का युनिक घर्ती आफ्नो गोलकिपरलाई दिएको बल रोक्न नसक्दा गोल भएको थियो । सोही गोल नै निर्णायक बन्यो । योसँगै वडा नम्बर १८ ले लिग चरणको आफ्नो दुई खेलबाट ६ अंक जोडेको छ । लगातार दुई जीत निकालेको वडा नम्बर १८ ले अन्तिम आठमा स्थान बलियो बनाएको छ । मेयरकपको पाँचौ दिनसम्मको लिग चरणका १३ वटा खेल सकिँदा कुल ६२ गोल भएको छ ।
घोराही उपमहानगरपालिकाको वार्षिक कार्यक्रम अनुसार नगर खेलकुद विकास समितिको आयोजनामा जारी प्रतियोगिता अन्तरगत बुधबार पनि लिग चरणका ३ खेल हुनेछन् ।
जस अनुसार वडा नम्बर ४ र १७ बिच बिहान ११ बजे, वडा नम्बर १५ र १३ बिच दिउँसो १ बजे र वडा नम्बर १६ र १ बिच अपरान्ह ३ बजे खेल हुने नगर खेलकुद विकास समितिका अध्यक्ष एवम् प्रतियोगिता संयोजक नरेन्द्र पुनले जानकारी दिए ।
प्रतियोगिता अन्तरगतका लिग चरणका खेलहरु पुस १६ गतेसम्म हुनेछ । चार समुहमा विभाजन गरी खेलाईएको लिगकम नकआउट प्रतियोगितामा समुहको उत्कृष्ट दुईमा पुग्ने टीम क्वाटर फाईनलमा जानेछ । क्वाटर फाईनलका खेल पुस १८ र १९ गते हुनेछ ।
पुस ५ गतेदेखि शुरु भएको प्रतियोगिताको सेमीफाईनल खेल पुस २१ गते हुनेछ भने फाइलन खेल पुस २३ गते हुनेछ । कुल ३९ खेल हुने प्रतियोगितामा पहिलो हुने वडाको टीमले नगद १ लाखसहित शिल्ड, मेडम, प्रमाण पत्र, दोस्रो हुने वडाको टीमले नगद ५० हजारसहित शिल्ड, मेडल र प्रमाण पत्र पाउनेछ ।।।।
२८ मंसिर २०८२, आइतबार
