काठमाडौँ ।
नेपालको विद्युत् प्रसारण प्रणालीलाई सुदृढ र विश्वसनीय बनाउने उद्देश्यले नयाँ बुटवल–बर्दघाट २२० केभी डबल सर्किट प्रसारण लाइन सञ्चालनमा ल्याइएको छ। यस प्रसारण लाइनले पश्चिम क्षेत्रमा निर्माण भइरहेका जलविद्युत् आयोजना र नेपाल–भारतबीचको विद्युत् व्यापारलाई सुदृढ पार्नेछ।
नवलपरासीको सुनवल नगरपालिका स्थित नयाँ बुटवल सबस्टेसनबाट बर्दघाट नगरपालिका सम्म २१ किलोमिटर लामो प्रसारण लाइन बिहीबारदेखि सञ्चालनमा ल्याइएको हो। यसले करिब १,२०० मेगावाट विद्युत् भार बोक्न सक्ने क्षमता राख्छ। यस परियोजनाले नेपालको आन्तरिक विद्युत् आपूर्ति प्रणालीलाई सुधार गर्दै भारतसँगको विद्युत् व्यापारलाई पनि सहज बनाउनेछ।
नेपाल विद्युत् प्राधिकरणका कार्यकारी निर्देशक कुलमान घिसिङका अनुसार यस परियोजनाले भोल्टेज सुधार र प्रणालीको विश्वसनीयता वृद्धि गर्नेछ। साथै, वर्षायाममा अतिरिक्त विद्युत् भारत तर्फ निर्यात र हिउँदमा विद्युत् आयात गर्नको लागि पनि यो प्रणाली सहायक हुनेछ।
यस प्रसारण लाइनको निर्माण नेपाल सरकार, विद्युत् प्राधिकरण र एसियाली विकास बैंकको सहुलियतपूर्ण ऋणमा गरिएको हो र यसको अनुमानित लागत एक अर्ब रुपैयाँ रहेको छ।
