खोज

चन्द्रौटा, २७ मंसिर ।
कपिलवस्तुको शिवराज नगरपालिकामा लाखौँ रकम बराबरको म्याद गुज्रेका खाद्य सामग्री र प्लास्टिकजन्य माला भेटिएका छ । शिवराज नगरपालिका मातहतमा पर्ने स्थानीय बजारको अनुगमनका क्रममा भेटिएका सामग्रीहरू बुधबार नष्ट गरिएको नगरपालिकाले जनाएको छ ।
नष्ट हुने सामग्रीमा ७७ थान भारतीय अण्डा, चिसो २५ थान, मुसा मार्ने बिषादी ५० प्याकेट, सुपारी ३ केजी, रायको बीउ साग ५२ प्याकेट, गाँजरको बीउ ६ प्याकेट, एक हजार ४७० थान प्लास्टिकका माला लगायत गरी करिब १ लाख ८० हजार रकम बराबरको सामग्री नष्ट गरिएको जनाइएको छ ।
नगरपालिकाका मेयर अजय थापाले आम नागरिकको स्वास्थ्य माथि खेलवाड गर्न नहुने बताए । प्लास्टिकका मालाले फूल खेती गरेका स्थानीय कृषकहरूले बजार नपाएकाले नष्ट गरिएको र बजारमा बिक्रीमा रोक लगाएको बताए । व्यापारीले हेलचेक्य्राइ गरेर म्याद गुज्रेका खाद्य सामग्री बेच्न नहुने मेयर थापाको भनाइ छ । सामग्री नष्ट गरेको बारे बताउँदै उनले भने– “यस प्रकारका अनुगमन र कारवाही नगरपालिकाले निरन्तरता दिने छ । हामी नागरिकको स्वास्थ्य र सुरक्षा सुनिश्चित गर्न प्रतिबद्ध छौँ ।
म्याद गुज्रेका खाद्य सामग्री र अन्य अमान्य उत्पादनहरूको बिक्रीलाई रोक्नका लागि हाम्रो टोलीले नियमित अनुगमन गर्नेछ ।” उनले थपे, “कृषक र व्यापारीलाई पनि चेतावनी दिँदै भविष्यमा यस प्रकारका सामग्रीहरू बजारमा पाइए, कानूनी अनुसार कारवाही हुनेछ । हाम्रो प्राथमिकता भनेको स्थानीयवासीको स्वास्थ्य र सुरक्षालाई सुनिश्चित गर्नु हो ।”
नागरिकलाई सचेत रहन र अस्वस्थकर सामग्रीबाट टाढा रहन थापाले आग्रह गरे । नगरपालिकामा खाद्य सुरक्षा र उपभोक्ता अधिकारको संरक्षणका लागि भविष्यमा पनि अन्य पहलहरू गर्न आवश्यक रहेको उनले बताए । अनुगमनको निरन्तरले बजारमा माछा मासु, बदाम, होटल तथा किरानाका खाद्यजन्य सामग्री बिक्री वितरणमा सुधार भएकोले प्रभावकारी भएको मेयर थापाको जिकिर छ ।