खोज

चन्द्रौटा (कपिलवस्तु), १९ मंसिर ।

कपिलवस्तुको शिवराज नगरपालिका वडा नम्बर-३ मा जेष्ठ नागरिक सम्मान गरिएको छ । जेष्ठ नागरिक सम्मान, हाम्रो सभ्यताको पहिचान भन्ने नारासहित ज्येष्ठ नागरिक सम्मान तथा न्यानो स्वेटर वितरण कार्यक्रम सम्पन्न गरिएको हो ।

जेष्ठ नागरिकहरुलाई चिसो मौसममा न्यानोपन गराउन न्यानो स्विटर वितरण गरिएको वडा अध्यक्ष टेकलाल सापकोटाले बताए । ज्येष्ठ नागरिकप्रति सम्मान व्यक्त गर्दै समाजमा सकारात्मक सन्देश प्रवाह गर्न कार्यक्रम गरिएको उनले बताए । बैंकमा भत्ता लिन नसक्ने ज्येष्ठ नागरिकलाई घरमै भत्ता समेत उपलब्ध गराएको सापकोटाले बताए ।

यसैबीच शिवराज नगरपालिकाका प्रमुख प्रशासकीय अधिकृत बाबुराम पौडेलले सम्मान कार्यक्रमसँगै ज्येष्ठ नागरिकहरूको आवश्यकतालाई सम्बोधन गर्ने लक्ष्य रहेको बताए । यस्तै कार्यक्रममा जेष्ठ नागरिक समाजका केन्द्रीय सहसचिव थानेश्वर खनालले नगरपालिकाले ज्येष्ठ नागरिक परिचयपत्र वितरण गरिरहेको जनाए ।

वडाभित्र ७५ वर्षभन्दा माथिका १८० जना ज्येष्ठ नागरिकलाई सम्मान गरिएको वडा कार्यालयले जनाएको छ । ज्येष्ठ नागरिक समाजका नगरकोषाध्यक्ष नरबहादुर पौडेल र अनिता भुसालले लगायतले कार्यक्रमलाई सम्बोधन गरेका थिए ।