खोज

सुर्खेत, १७ मंसिर ।

कर्णाली प्रदेशका विभिन्न स्थानीय तहमा निर्वाचित आठ जना जनप्रतिनिधिमध्ये माओवादीले दुई स्थानीय तहको उम्मेदवार जितेको छ भने एउटामा अग्रता लिएको छ । आइतवार भएको उपनिर्वाचनबाट नेकपा एमाले र काँग्रेसका उम्मेदवार दुई÷दुई स्थानमा विजयी भएका छन् भने नेपाल मजदुर किसान पार्टीका उम्मेदवार एउटा स्थानीय तहमा विजयी भएका छन् ।

दैलेखको महाबु गाउँपालिकाको अध्यक्षमा नेकपा एमाले विजयी भएको छ । नेकपा एमालेका उम्मेदवार जंगबहादुर शाही ३ हजार एक सय २७ मत ल्याउँदै विजयी बनेका हुन् । उनका निकटतम प्रतिद्वन्द्वी नेपाली कांग्रेसका झलकबहादुर भण्डारीले दुईहजार ६ सय ७५ मतल्याए । त्यस्तै, नेकपा माओवादी केन्द्रका जंगबहादुर बराल मगरले ८ सय ४२ मतप्राप्त गरे । यहाँ २०७९ सालको निर्वाचनमा कांग्रेसका लछुमन गुरुङ दुईहजार नौ सय ७९ मत पाएर विजयी भएका थिए । ०७९ माघ २७ गते हृदयघातका कारण उनको मृत्यु भएपछि उपनिर्वाचन भएको हो ।

जाजरकोटको नलगाड नगरपालिकाको उपप्रमुख पदमा नेकपा माओवादी केन्द्र विजयी भएको छ । माओवादी केन्द्रकी उम्मेदवार देवका लामिछाने चार हजार दुई सय ७२ मतका साथ विजयी भएकी हुन् । उनले कांग्रेसकी उम्मेदवार इन्द्र चन्द सिंहलाई पराजित गर्दै विजय हासिल गरेको निर्वाचन आयोगले जनाएको छ ।

त्यसैगरी हुम्लाको सर्केगाड गाउँपालिकाको उपाध्यक्षका लागि भएको उपनिर्वाचनको मतगणनामा माओवादी केन्द्रले अग्रता लिएको छ । आज दिउँसोसम्मको परिणाम अनुसार माओवादी केन्द्रकी उम्मेदवार देवकी तिमल्सिनाले चार सय ७७ मतसहित अग्रता लिएकी हुन् । एमालेकी उम्मेदवार जाना शाहीले चार सय ३ र नेपाली कांग्रेसकी सविता बुढाले तीन सय ४८ मत पाएकी छन् । यस्तै राप्रपा उम्मेदवार संगीता शाहीले २० र रास्वपा उम्मेदवार बाँचा बुढाले पाँच मत पाएका छन् ।

दैलेखको दुल्लू नगरपालिका–१३ मा नेकपा एमालेका लालबहादुर शाही विजयी भएका छन् । उनी पााँच सय ७४ मतसहित वडाध्यक्षमा निर्वाचित भएका हुन् । उनका प्रतिद्धन्द्धी नेपाली कांग्रेसका कांग्रेसबाट रेशमबहादुर शाहीले ५ सय ७१ मत ल्याएका छन् भने माओवादीबाट ढकेन्द्र शाहीले दुई सय ७८ मत मात्रै ल्याए । यहाँ रास्वपाले ५३, नेमकिपाले ४, राप्रपाले १३ र ३३ मत बदर भएका छन् ।

रुकुमपश्चिमको सानीभेरी गाउँपालिका–५ को वडाअध्यक्ष पदमा नेपाली कांग्रेस विजयी भएको छ । कांगेसका मोतिराम खत्रीले पाँच सय ९० मत ल्याएर निर्वाचित भएका हुन् । उनका निकटतम प्रतिद्धन्द्धी माओवादीका जसिराम बस्नेतले चार सय ३७ मत ल्याए । यहाँ कांग्रेसलाई एमाले र एकीकृत समाजवादीले साथ दिएका थिए ।

जाजरकोटको कुशे गाउँपालिका–७, को वडाअध्यक्ष पदमा नेपाली कांग्रेसका उम्मेदवार विजयी भएका छन् । कांग्रेसबाट खम्बबहादुर सिंह तीन सय ४७ मतसहित वडाध्यक्षमा निर्वाचित भएका हुन् । सिंहले आफ्ना प्रतिद्धन्द्धी नेकपा (माओवादी केन्द्र) का गोरखबहादुर नेपालीलाई १५ मतान्तरले पराजित गरे । नेपालीले तीन सय ३२ मत ल्याएका छन् । यस्तै एमालेबाट डम्बरबहादुर घर्तीले दुई सय ५२ मत ल्याएका छन् ।

डोल्पाको त्रिपुरासुन्दरी नगरपालिका– ५ को वडाध्यक्ष पदमा नेकपा (माओवादी केन्द्र) का नरबहादुर झाक्री विजयी भएका छन् । उनी एक सय ६१ मतसहित वडाध्यक्ष निर्वाचित भएका हुन् । उनका प्रतिद्वन्द्वी एमालेका नरबहादुर रोकाले एक सय १६ र नेपाली कांग्रेसका राजेन्द्रप्रसाद न्यौपानेले २१ मत पाएका छन् ।

कालिकोटको तिलागुफा नगरपालिका वडा नम्वर चारमा नेमकिपाका खड्गराज शाहीले एक सय ४३ मतका साथ विजय हासिल गरका छन् । उनका निकटतम प्रतिद्धन्द्धी माओवादी केन्द्रकी नैसोभा शाहीले एक सय १५ मत पाइन् । सो स्थानमा यसअघि माओवादी केन्द्रको उम्मेदवार विजयी भएकोमा अहिले नेमकिपा विजयी भएको हो ।