खोज

सुर्खेत, १३ मंसिर ।

उपनिर्वाचन नजिकिएसँगै कर्णालीमा स्थानीय तहका उम्मेदवारहरु प्रचारप्रसारको अभियानलाई तिव्रता दिएका छन् । उम्मेदवारहरु निर्वाचनको मत परिणाम आफ्नो पोल्टामा पार्न मतदाताहरु रिझाउनमा व्यस्त छन् । आगामी २०८४ को निर्वाचनलाई पनि यसले प्रभाव पार्ने भएकाले दलहरुले यसलाई आ आफ्नो प्रतिष्ठाका रुपमा हेरेका छन् ।

मंसिर १६ गते कर्णालीका आठ ठाउँमा उपनिर्वाचन हुँदै छ । पालिका अध्यक्ष, उपाध्यक्ष, उपमेयर र पाँच जना वडा अध्यक्ष पदका लागि निर्वाचन हुन लागेको हो ।

दैलेखको महाबु गाउँपालिकामा अध्यक्ष, जाजरकोटको नलगाड नगरपालिकामा उपमेयर र हुम्लाको सर्केगाड गाउँपालिकामा उपाध्यक्ष पदका लागि निर्वाचन हुँदैछ । यी तीन पालिकामध्ये सर्केगाड र नलगाडमा २०७९ को स्थानीय तह निर्वाचनको मतपरिणाम नेपाली कांग्रेस र माओवादीले गठबन्धन गरेर आफ्नो पक्षमा पारेका थिए । महाबुमा भने कांग्रेसले एक्लै लडेर जितेको थियो ।

यसरी गठबन्धन गर्दा सर्केगाडमा अध्यक्षमा कांग्रेस र उपाध्यक्षमा माओवादी उम्मेदवार निर्वाचित भएका थिए । नलगाडको मेयरमा माओवादी र उपमेयरमा कांग्रेस उम्मेदवार निर्वाचित भएका थिए । महाबु गाउँपालिकामा भने नेपाली कांग्रेस एक्लै लड्दा अध्यक्ष र उपाध्यक्ष दुवै जितेको थियो । त्यतिबेला महाबुमा नेकपा माओवादी केन्द्र र नेकपा (एकीकृत समाजवादी) ले चुनावी गठबन्धन गरेका थिए । अहिलेको निर्वाचनमा भने तीन वटै पालिकामा दलहरु एक्लाएक्लै लड्दै छन् । विशेषगरी अघिल्ला निर्वाचनमा त्रिपक्षीय भिडन्त हुँदै आएको पालिमामा यस पटक भने पहिलोपटक रास्वपाले पनि उम्मेदवार उठाएको छ । जसको कारण मतपरिणाममा फरक नतिजा आउन सक्ने आंकलन पनि गरिएको छ ।

२०७९ को निर्वाचनमा सर्केगाड गाउँपालिकामा उपाध्यक्ष पदमा लडेका माओवादीका चन्द्रसिंह कार्की ३ हजार २६९ मत ल्याएर निर्वाचित भएका थिए । त्यतिबेला कांग्रेस र माओवादीको गठबन्धन थियो । गठबन्धनबाट अध्यक्षको उम्मेदवार बनेका कांग्रेसका ठानबहादुर रोकायाले ३ हजार ५४३ मत ल्याएर निर्वाचित भएका थिए । अघिल्लो निर्वाचनमा माओवादीले जितेको सर्केगाड गाउँपालिकामा यो पटक त्रिपक्षीय भिडन्त हुने देखिएको छ । त्यतिबेला यहाँ कांग्रेसले माओवादीलाई समर्थन गरेको थियो । यसपटक रिक्त उपाध्यक्ष पदका लागि कांग्रेसले सविता बुढालाई उम्मेदवार बनाएको छ । एमालेले जाना शाही र माओवादीले देवकी तिमल्सिनालाई उठाएको छ । पहिलोपटक उम्मेदवारी दिएको रास्वपाले बाँचा बुढालाई उम्मेदवार बनाउँदा राप्रपाले संगिता शाहीलाई अघि सारेको छ । नरेश शाहीले स्वतन्त्र उम्मेदवारी दिएका छन् ।

२०७९ मा नलगाडमा माओवादी र कांग्रेसबीच गठबन्धन भएको थियो । गठबन्धनबाट मेयरको उम्मेदवार बनेका डम्बरबहादुर रावत ५ हजार ५९९ मत ल्याएर निर्वाचित भएका थिए । एमालेबाट उम्मेदवार धर्मबहादुर शाहीले ३ हजार ६ सय २६ मत ल्याएर दोस्रो भएका थिए । उपमेयरमा भने गठबन्धनको एउटा मात्र उम्मेदवारी परेको थियो । कांग्रेसबाट गठबन्धन उम्मेदवार सरिता सिंह ५ हजार ४ सय ६ मत ल्याएर निर्वाचित भइन् । प्रतिद्वन्द्वी एमालेकी सुनिता बोहराले ३ हजार ३ सय ९३ मत ल्याएर दोस्रो भएकी थिइन् ।

उपमेयर पदका लागि हुने अहिलेको उपनिर्वाचनमा नलगाडमा ६ वटा दलले एक्लाएक्लै प्रतिस्पर्धा गर्दैछन्। नेपाली कांग्रेस, नेकपा एमाले, राष्ट्रिय प्रजातन्त्र पार्टी नेपाल, नेकपा माओवादी केन्द्र, नेपाल समाजवादीपार्टी र राष्ट्रिय स्वतन्त्र पार्टी चुनावी मैदानमा उत्रिएका हुन् । कांग्रेसबाट ईन्द्रा चन्द सिंह, एमालेबाट सुनिता बोहरा, राप्रपा नेपालबाट सुनिता पुन रावल, माओवादी केन्द्रबाट देवका लामिछाने, नेपाल समाजवादी पार्टीबाट पवित्रा जैसी र रास्वपाबाट पार्वती पुन उम्मेदवार छन् ।

अघिल्ला निर्वाचनको मत परिणामलाई हेर्ने हो भने महाबु गाउँपालिकामा काँग्रेस र माओवादीबीच प्रतिस्पर्धा हुने देखिन्छ । अहिलेको उपनिर्वाचनमा महाबु गाउँपालिकाको अध्यक्ष पदका लागि सात वटा दल चुनावी मैदानमा छन् । कांग्रेसबाट झलकबहादुर भण्डारी, एमालेबाट जंगबहादुर शाही, माओवादी केन्द्रबाट जंगबहादुर बराल, नेकपा एकीकृत समाजवादीबाट जगत हमाल, रास्वपाबाट प्रकाश बुढा, राप्रपाबाट सुर्जे रावत र नेमकिपाबाट दुर्गबहादुर मगर उम्मेदवार छन् । यस अघिको निर्वाचनमा काँग्रेस एक्लैले अध्यक्ष उपाध्यक्षमा चुनाव जितेको थियो ।