खोज

नेपाल प्रिमियर लिग (एनपीएल) को पहिलो संस्करण यही मंसिर १६ गतेदेखि सुरु हुँदै छ । पुस ६ गते सम्पन्न हुने एनपीएलको ट्रफी पनि सार्वजनिक भएको छ । प्रधानमन्त्री केपी शर्मा ओलीले एनपीएलको ट्रफीको अनावरण गरेका छन् । मुख्य आकर्षण सगरमाथाको आधार शिविर कालापत्थरको ढुंगा रहेको छ । यो ट्रफीमार्फत विश्वलाई हिमाल संरक्षण गर्ने सन्देश समेत दिने विश्वास गरिएको छ । पहिलोपटक नेपालमा हुन लागेको एनपीएलले नेपालको पर्यटन बजारलाई विश्वमाझ प्रवद्र्धन गर्न सहयोग पुग्ने विश्वास गरिएको छ । काठमाण्डौंको त्रिभुवन विश्वविद्यालय क्रिकेट मैदनमा हुने एनपिएलको लागि देश तथा विदेशका खेलाडी काठमाण्डौं आउनेक्रम सुरु भैसकेको छ । खेलाडीमा मात्र होइन खेलप्रेमीमा समेत पहिलो संस्करणको अन्तर्राष्ट्रिय स्तरको क्रिकेटले उत्साह सिर्जना गरेको छ । वास्तवमा यो खेलकुदले नेपालको गौरव बढाउने निश्चित छ । नेपालमा अन्तर्राष्ट्रिय स्तरका खेल आयोजना गर्न नसकिएपनि कम्तीमा पनि पहिलो संस्करणको एनपिएलमा हुने चर्चित र नाम चलेका विदेशी खेलाडीको सहभागीताले नेपालमा खेलकुदको लहर सिर्जना गरेको छ । नेपालमा राष्ट्रियमात्र होइन अन्तर्राष्ट्रिय स्तरकै खेलाडी पनि खेलका लागि आउँछन भन्ने यो प्रमाण पनि हो । राष्ट्रिय खेलकुदमा विगतमा आफैले बनाएका राष्ट्रिय किर्तिमान खेलाडीले तोडेका छन र नयाँ राष्ट्रिय किर्तिमान स्थापित गरेका छन् । क्रिकेटमा नेपालका खेलाडीले विश्व इतिहास कायम गरेका छन् । खेल क्षेत्रमा अवसर पाउने हो भने राष्ट्रिय उत्साह सिर्जना गर्न सक्छन भन्ने नेपाली खेलाडी उदाहरण पनि हुन । खेलाडीहरू नेपालमा अवसर नभएकै कारण विदेश पलायन हुन बाध्य भैरहेको बेला कम्तीमा पनि काठमाण्डौंमा हुने एनिपएलले खेलाडीहरूमा नयाँ आशा जगाएको छ । एनपिएल समापन भएपछि सरकारले राष्ट्रका लागि आशालाग्दा खेलाडीलाई रोजगारीको अवसर प्रदान गरोस् । राष्ट्रलाई खुसी दिने एक मानकमध्ये खेलकुद पनि एक माध्यम हो भन्दा फरक पर्दैन ।

नेपालको परिचय अन्तर्राष्ट्रिय रूपमा स्थापित गराउने महत्वपूर्ण एवं प्रभावकारी माध्यम खेलकुद हो । वास्तवमा अन्तर्राष्ट्रिय प्रतियोगितामा सहभागी हुने खेलाडीले राष्ट्रकै प्रतिनिधित्व गरेका हुन्छन् । मैदानमा खेलाडीले गर्ने प्रदर्शन र देखाउने व्यवहारसँग देशको प्रतिष्ठा र चिनारी गाँसिएको हुन्छ । त्यसैले खेलाडीलाई सम्बन्धित राष्ट्रको सद्भावना दूतका रूपमा हेरिएको हुन्छ । एनपिएलले राष्ट्रको गौरव बढाउने निश्चित छ । तर सरकारको चासोको विषयभित्र खेलकुद नपर्नु नेपालको अहिलेसम्मको यथार्थ हो । निश्चय नै विगतमा कोरोना महामारीका कारण खेलकुद क्षेत्र ओझेलमा परेको हो । एनपिएलका माध्यमबाट नेपालमा फेरी खेल जीवनले गति लिने आशा जागेको छ । अहिलेपनि नेपालको खेलकुद विकासमा भौतिक पूर्वाधारको ठूलो अभाव छ । नेपाली खेलकुदमा पूर्वाधारको ठूलो समस्या छ । पर्याप्त बजेट अभावमा गतिला खेलस्थल निर्माण हुन सकेका छैनन् । भएका पूर्वाधार मर्मत अभावमा जीर्ण बन्दै गएका छन् । यसको एक मात्र कारण राज्यको आँखा खेलकुदमा नपर्नु नै हो । त्यसैले नेपालको खेल क्षेत्रले अहिलेसम्म व्यावसायिक फड्को मार्न सकेको छैन । यो तीतो यथार्थ हो । खेलाडीमा पनि खेलकुदमै लागेर सुखद भविष्यको रेखा कोर्न सकिन्छ भन्ने विश्वास छैन । सरकारले खेलकुद क्षेत्रमा लागेका खेलाडीलाई कुनै प्रोत्साहनको कार्यक्रम दिन सकेको छैन । जेहोस मंसिर १६ देखि हुने एनपिएलको महाकुम्भले खेल जीवनलाई गति प्रदान गर्न सहयोग पुग्ने छ । एनपिएल खेल्न विदेशका नाम चलेका खेलाडी आउँदैछन् । नेपाली खेलाडीले उनीहरूसंगै खेल खेल्न पाउनु गर्बकै कुरा हो । त्यसबाट नेपाली खेलाडीमा आत्मबल बढाउन सहयोग पुग्नेछ । तसर्थ एनपिएललाई सफल बनाउन सरकारले सहयोग गर्नुपर्दछ । एनपिएलले नेपालमा खेलको माहोल सिर्जना गर्न सहयोग पु¥याउने विश्वास गरिएको छ ।