खोज

जितपुर, ११ मंसिर ।
जिल्लाको बाणगङ्गा नगरपालिकाले कृषिमा प्रविधिको प्रयोगलाई प्रोत्साहित गर्दै ‘जियो कृषि’ नामक एप्स मार्फत कृषकलाई सेवा दिन सुरु गरेको छ । यो एप्स नगरपालिकाले कृषकहरूको खेतीसम्बन्धी समस्या समाधानका लागि दुई वर्षदेखि प्रयोगमा ल्याएको हो ।
नगर प्रमुख चक्रपाणि अर्यालका अनुसार एप्समा कृषकले आफ्नो खेतको लोकेसन, बाली लगाएको समयजस्ता विवरण राखेपछि सिँचाइ गर्नुपर्ने समय, मल हाल्ने तालिका र खेतीमा लाग्ने रोगबारे आवश्यक जानकारी एसएमएस मार्फत प्राप्त गर्न सक्छन् । यसले कृषकलाई समयमै सल्लाह र आवश्यक निर्देशन दिन मद्दत पु¥याएको छ ।
नगरपालिकाले गरेको सर्वेक्षण अनुसार, १५ हजारभन्दा बढी घरधुरी कृषि पेसामा निर्भर छन् । हालसम्म ५ हजार कृषकले यो सेवा लिएका छन्, जसमध्ये १ हजार बढी सक्रिय रूपमा एप्स प्रयोग गरिरहेका छन् । नगरपालिकाका कृषि शाखा प्रमुख लेष बहादुर केसीका अनुसार, एप्सले कृषकलाई प्रमुख बजारका मूल्य सूची, मौसमको जानकारी र नगरपालिकाका सूचना सहजै थाहा पाउने माध्यम पनि बनेको छ ।
एप्स प्रयोग गर्दा कृषकहरूका लागि खेतीमा देखिएका समस्या समाधान गर्न सहज भएको छ । मटेरीयाका कृषक इन्द्रेस चौधरीले एप्सले बालीमा लागेको रोग र किराको प्रकोपको समाधान तुरुन्तै गर्न सहयोग पु¥याएको बताए ।