खोज

लमही ।

चीनको सिचुआन प्रान्तमा आयोजित अन्तर्राष्ट्रिय सम्मेलनमा लुम्बिनी प्रदेशका मुख्यमन्त्री चेतनारायण आचार्यले बुद्ध सर्किटको विकासका लागि महत्वाकांक्षी योजना अघि सारेका छन्। उनले रुपन्देही, नवलपरासी पश्चिम र कपिलवस्तुलाई जोड्ने मोनोरेल सञ्चालनको सम्भाव्यता अध्ययनमा विदेशी लगानीकर्ता र विज्ञहरूसँग सहकार्यको प्रस्ताव गरेका छन्।

मुख्यमन्त्री आचार्यले लुम्बिनी प्रदेशको राजधानीलाई नमुना शहर बनाउन र प्रभावकारी सडक सञ्जाल विस्तार गर्न पनि योजना अघि बढाइएको जानकारी गराउँदै विदेशी लगानीकर्तालाई कृषि, उद्योग, र पर्यटन क्षेत्रमा लगानीका लागि आकर्षित गर्न सफल भएको बताए।

मुख्यमन्त्रीले लुम्बिनी प्राविधिक विश्वविद्यालयको स्थापना, सुरुङमार्ग निर्माण, पर्यटन भौतिक पूर्वाधार विकास, र कृषक तथा जडिबुटी उत्पादकहरूको क्षमता अभिवृद्धि लगायतका क्षेत्रमा सहयोगका लागि चिनियाँ पक्षसँग छलफल गरेका छन्।

उक्त सम्मेलनमा लुम्बिनी प्रदेशका आर्थिक मामिला मन्त्री धनेन्द्र कार्की, प्रमुख सचिव महादेव पन्थ, र अन्य उच्च पदाधिकारीहरूको उपस्थिति थियो। मुख्यमन्त्री आचार्यको यो प्रस्तुति विदेशी लगानी र सहकार्यलाई लुम्बिनी प्रदेशको विकासमा केन्द्रित गर्न महत्वपूर्ण कदमको रूपमा हेरिएको छ।