खोज

कपिलवस्तु २७ कार्तिक ।
पुरानो र जीर्ण भवनमा रहेको सिहोखोर स्वास्थ्य चौकीका लागि अति आवश्यक रहेको नयाँ भवन निर्माण पुरा भएको छ । सेचन करुणा नामक गैरसरकारी संस्थाले यशोधरा गाउँपालिका वडा नम्बर ८ स्थित सिहोखोर स्वास्थ्य चौकीको दुई कोठे भवन, बराण्डा र शौचालय निर्माण गरि हस्तान्तरण गरे सगै नयाँ भवनबाट सेवा दिन शुरु गरिएको हो । परिवार नियोजन संघको भिजन २००० परियोजनाको सहयोगमा निर्माण भएको भवनलाई यस अघि स्वास्थ्य चौकी भवनको रूपमा प्रयोग गरिदै आएको थियो ।
३० बर्ष पुरानो २ कोठे भवनमा गर्भवती परिक्षण लगायतका सेवा दिदाँ बर्षातका बेला चुहिने समस्या भोग्दै आएका स्वास्थ्यकर्मीलाई नयाँ भवन निर्माण भए सगै सेवा प्रवाहमा सहजता मिलेको छ । चुहिने भवनका कारण सेवा प्रवाह गर्दा बिभिन्न कठिनाई भोग्नु परेको भएपनि नयाँ भवन सहितको पूर्वाधारका कारण सेवा प्रवाह सहज बनेको सिहोखोर स्वास्थ्य चौकीकी अनमी कल्पना चुनाराले बताइन । ७ जनाको जनशक्ति रहेको स्वास्थ्य चौकीमा कार्यरत कर्मचारीका लागि पुरानो भवनबाट सेवा प्रवाह गर्न बिगतमा समस्या पर्दै आएको थियो । स्वास्थ्य चौकीको दुई कोठे भवन सहितको पूर्वाधार निर्माणका लागि १२ लाख ८१ हजार २ सय ५५ रूपैया लागत लागेको थियो । जस्मा सेचन करुणाले १२ लाख १९ हजार ८ सय ८१ रूपैया रकम सहयोग गरेको हो । संस्थाले गरेको सहयोगमा स्थानिय समुदायको अगुवाईमा गठित निर्माण समितिले ६१ हजार ३ सय ७४ रूपैयाँ बढिको जनश्रमदान गरेपछि स्वास्थ्य चौकीको भवन निर्माण पुरा भएको थियो ।

भवन निर्माण पुरा भएपछि संस्थाले स्वास्थ्य चौकीको भवन हस्तान्तरण गरेको थियो । सो सगै स्वास्थ्य चौकीका लागि आवश्यक करिब ६० हजार मुल्यका बिभिन्न फर्निचरका सामाग्री समेत संस्थाबाट दिईएको थियो । नयाँ भवनमा कार्यालय कोठा, गर्भवति जाँच सेवा, खोप सेवा र परिवार नियोजन सेवा प्रदान गरिएको स्वास्थ्य चौकीका प्रमुख सिनियर अहेव अघिकृत केशवराज घिमिरेले जानकारी दिए । आफुले स्वास्थ्य सेवाको क्षेत्रमा २५ बर्ष काम गर्दा भौतिक पुर्वाधार निर्माण र पारदर्शितामा हाल सम्म सो संस्थाको जस्तो राम्रो काम अन्यत्र नदेखेको घिमिरेले अनुभव सुनाए । “यो संस्थाको काम गर्ने शैली समन्वयकारी र कार्य सम्पादन धेरै नै पारदर्शि रहेको देखें ।” उनले भने ।
आफु दुई पटक वडामा निर्वाचित भएको र हाल सम्मको संघ संस्थाको काम हेर्दा सेचन करुणाको काम गर्ने शैली उत्कृष्ट भेटिएको वडा नम्बर ८ का अध्यक्ष सहाबुद्धिन मुसलमानले बताए । संस्थाले आम नागरिक प्रत्यक्ष रूपमा लाभग्राही हुने कार्यमा पारदर्शि रूपमा लगानी गर्दै आएको उनले जानकारी दिए । संस्थाले पूर्ण सरसफाई कार्यक्रम अन्र्तगत वडामा ३० वटा परिवारमा शौचालय निर्माणमा समेत सहयोग गरेको उनले बताए । “संस्थाले यसै वडामा रहेको राष्ट्रिय निमाबिको चार कोठे भवन र एक कोेठे खोप केन्द्र निर्माण गर्न समेत सहयोग गर्ने प्रतिबद्धता जनाएको छ ।” वडा अध्यक्ष मुसलमानले भने । “कतिपय संस्था आउँछन, समुदायका व्यक्ति जुटाएर बाटोमा बढार्छन अनि भत्ता बाडे्र जान्छन । ति संस्थाले यो संस्थाको राम्रो कामहरूको सिको गर्न आवश्यक छ,” उनले थपे ।
सेचन करुणा संस्थाले जिल्लाको यशोधरा गाउँपालिकाको वडा नम्बर ७ र ८ तथा बिजयनगर गाउँपालिकामा कार्यक्रम सञ्चालन गर्दै आएको छ । गाउँपालिकाको वडा नम्बर ७ सोमडिहका लागि स्वास्थ्य सेवा प्रवाह सहज बनाउन एम्बुलेन्स खरिदका लागि संस्थाले पालिकालाई २० लाख ८ हजार रूपैया दिएको छ । जसबाट अहिले पालिकाले एम्बुलेन्स खरिद प्रक्रिया अगाडी बढाएको छ । त्यसै गरि बिजयनगरको गुगौली स्वास्थ्य चौकीका लागि १ हल तथा २ कोठा निर्माण गरि हस्तान्तरण गर्ने कार्य पुरा भएको छ । १४ लाख ७८ हजारको लागतमा सेचन करुणाले १० लाख रूपैया, गाउँपालिकाले ४ लाख ७८ हजार रूपैया र निर्माण समितिले १ लाख ६४ हजार बढिको श्रमदान गरेका थिए । जस्का कारण स्वास्थ्य चौकीका लागि आवश्यक पूर्वाधार निर्माण भएको थियो ।
संस्थाले दुवै पालिकामा प्रजनन स्वास्थ्य शिविरको आयेजना, बालबिकास शिक्षकलाई टिपीडी तालिम, सरसफाई तथा स्वच्छता बारे तालिम दिएको छ । त्यसैगरि संस्थाले बिजयनगरमा ८० र यशोधरामा ३० वटा शौचालय निर्माणमा सहयोग गरेको छ । संस्थाले नयाँ शौचालय निर्माणका लागि प्रति परिवार १० हजार ५ सयका दरले तथा पुरानो शौचालय मर्मतका लागि ७ हजारको दरले सहयोग दिएको हो । त्यसै गरि गाउँ, वडा र पालिका तहको स्वच्छता समिति निर्माणमा सहयोग, बर्थिङ्ग सेन्टर, स्वास्थ्य चौकीमा फर्निचर तथा उपकरणको सहयोग, गर्भवतीका परिवारलाई दौतरी शिक्षा, स्वास्थ्यकर्मीलाई तालिम र महिला सामुदायिक स्वास्थ्य स्वयंसेविका परिचालनमा समेत संस्थाबाट सहयोग भएको जनाईएको छ । हाल सम्म गरिएका कार्यक्रमहरू प्रभावकारी रहेको र सन २०२४ देखी २०२६ को अबधी सम्म दिगो बिकास लक्ष्यका सुचकलाई सहयोग पुर्याउन कार्यक्रम सञ्चालनले सहयोग पुग्ने सेचन करुणाका कपिलवस्तु फिल्ड अफिसका प्रमुख हुमलाल अधिकारीले जानकारी दिए । “हामीले कार्यक्रम सञ्चालनको शूरुवात बाटै पालिका र वडा तह सम्ममै प्रभावकारी समन्वय गरेका छौं । कार्यक्रम सञ्चालन भएका स्थानको आवश्यकतामा आधारीत सहयोगमा साझेदारी गरेका छौं ।” प्रमुख अधिकारीले भने ।