खोज

गुल्मी, २६ कार्तिक ।
नेपाल वायुसेवा निगमले गुल्मीमा हवाई उडानको समय तालिकामा परिवर्तन गरेको छ । निगमले गुल्मी यस अघि बुधबार र शुक्रबार गरि सातामा दुई दिन उडान गर्दै आईरहेकोमा अबदेखि बिहिबार एक दिन मात्र उडान गर्ने भएको हो ।
नेपाल वायुसेवा निगमको एउटा जहाज ग्राउण्डेट र अर्को अप्रेशनमा रहेको कारण उक्त जहाज नबन्दासम्म निगमले सातामा एक दिन बिहिबार मात्र उडान गर्ने तालिका रहेको रेसुङ्गा विमानस्थलका स्टेशन प्रमुख सुमन थापाले जानकारी गराएका छन । निगमले यस अघि बुधबार र शुक्रबारको समय तालिका परिवर्तन गरि बिहिबारलाई उडानको समय तोकेको हो ।
रेसुङ्गा विमानस्थलमा प्रतिकुल मौशमका कारण लामो सयमदेखि हवाई उडान अबरुद्ध हुँदै आएको अबस्थामा गत दुइ सातादेखि मात्र नियमिति उडान शुरु भएको थियो । निगमले नियमित उडान शुरुभएसँगै पुनः उडान तालिकामा परिवर्तन गरेको हो । जिल्लामा हवाई सेवा सञ्चालन गरिएको केही समयपछि साताको चार पटकसम्म उडान गर्दैै आएको निगमले सातामा तीन पटक, दुई पटक गर्दै तालिका परिवर्तन गरि अबदेखि बिहिबार मात्र उडान गर्ने भएको छ ।

नेपाल वायुसेवा निगमले रेसुङ्गादेखि काठमाडौंका लागि ७ हजार ३०० र काठमाडौंबाट रेसुङ्गाका लागि ७ हजार ५०० रूपैयाँ भाडादर कायम गरेकोे छ । गुल्मी–काठमाडौंका लागि नेपाल वायुसेवा निगमको १८ सिट क्षमताको ट्वीनिटर जहाजले उडान गर्दै आईरहेको छ । काठमाडौंबाट बिहान ६ः३० बजे र रेसुङ्गा विमानस्थलबाट बिहान ७:३० बजे नियमित उडान तालिका रहेकोे छ ।
जिल्लामा गत एक वर्ष अघिदेखि व्यावसायीक रूपमा हवाई उडान भैरहेको छ । रेसुङ्गा विमानस्थलमा दिउसोको समयमा अत्याधिक हावा चल्ने भएका कारण बिहानको समयमा मात्र उडानहुने गर्दछ । पछिल्लो समयमा हवाई सेवा शुरु भएसँगै जिल्लामा आउने आन्तरिक एवं वाह्य पर्यटकहरूको संख्यामा पनि बृद्धिहुँदै जान थालेको छ । रेसुङ्गा विमानस्थल सदरमुकाम तम्घासबाट ५ किलो मिटरको दुरीमा रहेको छ ।