खोज

बुटवल, १० कात्तिक ।

रोटरी क्लब अफ सेन्ट्रल लुम्बिनीले आफ्नो ९औं चार्टर दिवसको अवसरमा मानव सेवा आश्रममा विशेष भोजन दान कार्यक्रमको आयोजना गरेको छ । क्लबका सदस्यहरूको आर्थिक योगदानबाट रु. ५० हजार संकलन गरी असहाय, बेसहारा र विपन्न नागरिकहरूलाई भोजन वितरण गरिएको हो । क्लबका कार्यक्रम संयोजक शिवशंकर जयसवालको नेतृत्वमा आयोजना गरिएको यो कार्यक्रममा क्लबका सदस्यहरूको उपस्थिति थियो।

कार्यक्रममा मानव सेवा आश्रम नेपालका केन्द्रीय अध्यक्ष रामजी अधिकारीले मानव सेवा आश्रम र रोटरी क्लब अफ सेन्ट्रल लुम्बिनीबीचको सहकार्यलाई निरन्तरता दिनुपर्नेमा जोड दिँदै नेपाललाई सडकमा आश्रय खोजिरहेका सहयोगापेक्षी नागरिकहरूबाट मुक्त बनाउनका लागि यस्ता सेवामूलक कार्यहरू आवश्यक रहेको बताए ।

कार्यक्रमको औपचारिक सुरुवातमा क्लबका संस्थापक अध्यक्ष विमल सेन्चुरीले विगत ९ वर्षदेखि रोटरी क्लबले समाजसेवामा पुर्याउँदै आएको योगदानबारे जानकारी गराउँदै सेवा र मित्रताको यो यात्रालाई अझ सशक्त बनाउन प्रतिबद्ध रहेको उल्लेख गरे। कार्यक्रममा सचिव गंगाधर भण्डारी, क्लबका पूर्व अध्यक्ष कृष्णप्रसाद पाण्डेले यस वर्षको भोजन दान कार्यक्रमले स्थानीय समुदायमा सकारात्मक प्रभाव पुर्याउने विश्वास व्यक्त गरे ।

रोटरी क्लब अफ सेन्ट्रल लुम्बिनीका भावी अध्यक्ष विष्णु शर्माले यो कार्यक्रमलाई सफल बनाउन पाउँदा गर्व महसुस भएको बताए । क्लबका सदस्यहरूले सहयोग गरेर रु. ५०हजार जुटाएर यो समाजसेवाको कार्य सम्पन्न गरिएकोमा उनले सबै सदस्यहरूलाई धन्यवाद व्यक्त गरेका थिए । यसैगरी, यस पाली को चार्टर डे मा मानव सेवा मा भोजन दान कार्यको अवधारणा राखेको इभेन्ट म्यानेजमेन्ट चेयर बासु बादलले यस प्रकारका सहयोगात्मक कार्यहरू समाजमा सकारात्मक सन्देश प्रवाह गर्ने बतायका थिए ।

यस प्रकारका सेवा कार्यहरूले समाजमा सहयोगको भावना अझ सुदृढ बनाउन महत्वपूर्ण भूमिका खेलेको छ, रोटरी क्लब अफ सेन्ट्रल लुम्बिनीले आगामी दिनहरूमा पनि यस्तै सेवाका कार्यहरू जारी राख्ने प्रतिबद्धता व्यक्त गरेको छ।