खोज

गुल्मी, ०८ कार्तिक ।
विगत चार महिनादेखि पटक पटक अबरुद्ध बन्दै आएको गुल्मीको हवाई उडानले बुधबारदेखि नियमित भएकोे छ । खराब मौसमको कारण लामो समयसम्म यसरी हवाई सेवा नियमित नहुँदा यहाँका यात्रुहरू थप समस्यामा परेका थिए । गत असार महिनाको दोश्रो सातादेखि प्रभावित बनेको नेपाल वायुसेवा निगमको जहाजले केही समयको अन्तरालपछि बुधबार पुनः उडान भरेको छ ।

हवाई सेवाबाट यात्रा गर्ने यात्रुहरू टिकट काटेर पनि पटक पटक बिमानस्थल पुगेर घण्टौसम्म पर्खेर उडान नहुँदा निरास बनेर फर्कने बानि परेका यात्रुहरूलाई बुधबार भने निराश भई फर्कनु परेन । चाडपर्वको समयमा लगातार उडान अवरुद्ध हुँदा नागरिकले सेवा पाउन सकेका थिएनन् । महत्वपूर्ण चाड पर्वको समयमा लगातार उडान अवरुद्ध हुँदा नागरिकमा असन्तुष्टि पैदा भएकोे अबस्थामा मौशम सुधारसँगै यात्रुहरूमा थप आशा पलाएको छ ।

कतिबेला उडान होला भनेर घरबाट बिदा भएर काठमाडौँ र गुल्मी आवतजावत गर्ने यात्रुहरू कतिबेला मौशमा सुधार होला भनेर घण्टौसम्म हवाईजहाज उड्ने प्रतिक्षामा बसिरहेको अबस्था यस अघिसम्म थियो । बाक्लो कुहिरो लाग्ने भएका कारण गत असार १४ गतेदेखि अबरुद्ध बनेको उडान सेवाले निरन्तरता पाएको छ ।
साताको दुई पटक नियमित उडान गर्दै आएको नेपाल एयरलाइन्सले प्रतिकुल मौसमका कारण केही समय उडान गर्न नसकेको रेसुङ्गा विमानस्थलका स्टेशन प्रमुख सुमन थापाले बताए । गत असार महिनाको दोश्रो सातादेखि जिल्लामा जम्मा छ वटा मात्र उडान भएको छ । जहाज नियमित नभएपनि रेसुङ्गा–काठमाडौं र काठमाडौं–रेसुङ्गा आवतजावतका लागि निगमले टिकट भने सधै दिँदै आईरहेको छ ।

यात्रुहरूको चापका कारण साताको चारपटक पटकसम्म यहाँ उडान हुँदै आएको थियो । गुल्मी–काठमाण्डौका लागि नेपाल वायुसेवा निगमको १८ सिट क्षमताको ट्वीनिटर जहाजले उडान गर्दै आईरहेको छ । काठमाण्डौबाट बिहान ६ः३० बजे र रेसुङ्गा विमानस्थलबाट बिहान ७: ३० बजे नियमित उडान तालिका रहेकोे छ ।

नेपाल वायुसेवा निगमले रेसुङ्गादेखि काठमाडौंका लागि ७ हजार ३०० र काठमाडौंबाट रेसुङ्गा लागि ७ हजार ५०० रूपैयाँ भाडा निर्धारण गरेकोे छ । जिल्लामा गत एक वर्ष अघिदेखि व्यावसायिक रूपमा नियमित रूपमा हवाई उडान सुरु गरिएको हो । रेसुङ्गा विमानस्थलमा दिउँसोको समयमा अत्याधिक हावा चल्ने भएका कारण बिहानको समयमा मात्र उडान गरिएको छ । पछिल्लो समयमा हवाई उडान शुरु भएपछि गुल्मी जिल्लामा आउने आन्तरिक एवं वाह्य पर्यटकहरूको संख्यामा पनि बृद्धि भएको छ ।

काठमाण्डौबाट रेसुङ्गा विमानस्थलका लागि करिब डेढवर्षको अबधिमा १ सय ३० वटा मात्र उडान गरिएकोे छ । सदरमुकाम तम्घासदेखि ५ किलो मिटरको दुरीमा कच्चि सडक मार्फत रेसुङ्गा विमानस्थल पुग्न सकिन्छ ।