पाल्पा, २५ असोज ।
मुख्य पर्व नजिकिदै जाँदा यहाँका व्यापारीले उपभोग्य वस्तुको मूल्य बढाएका छन् । बजार अनुगमन तथा नियमनको अख्तियारी प्राप्त स्थानीय सरकारले नियमित रुपमा बजार अनुगमन नगरेका कारण व्यापारीले अस्वभाविक रुपमा मूल्य वृद्धि गरेका हुन् ।
सरदमुकाम तानसेनमा उपभोग्य वस्तु दाल, चामल, मसलाको पसल अनुसार फरक फरक मूल्यमा बिक्री गरेका छन् । अडरको दाल प्रति के.जी २० रुपैयाँ सम्म फरक भएको स्थानीय सुदिप बस्याल बताउँछन् । नगर सरकारले मौसमी अनुगमन गर्ने गर्दा व्यापारीले आफु खुसी बिक्री गरेको उनी बताउँछन् ।
स्थानीय सरकारको उपप्रमुख तथा उपाध्यक्षलाई बजार अनुगमनको लागि जिम्मेवारी तथा अख्तियारी सरकारले उपलब्ध गराए पनि औपचारिकतासँगै कर मात्र उठाउने ध्यान केन्द्रित भएका कारण व्यापारीले आफुखुसी व्यापार गरेको स्थानीयहरुको भनाई छ ।
चामलमा ३० देखि ४० रुपैयाँ सम्म, जिरा मसलामा ५० देखि १०० रुपैया सम्म फरक भएको तानसेनकी स्थानीय कल्पना कार्की बताउँछिन् । तानसेन बजारमा खाद्य तथा गुण नियन्त्रण, घरेलु तथा साना उद्योग, उद्योग वाणिज्य संघका प्रतिनिधि सम्मिलित टोलीले केहीदिन अगाडि बजार अनुगमन गर्दा म्याद समाप्त भएका सामानमा मात्र ध्यान केन्द्रित भयो । मूल्यमा एकरुपतातर्फ केन्द्रित नभएको अनुगमनमा सहभागी एक सदस्यले बताए ।
सदरमुकाम तानसेनको प्रशासनिक केन्द्र सामुन्नेमा चर्को मूल्यमा सामान बिक्री हुँदा सम्म स्थानीय प्रशासन बेखबर हुनु अत्यन्तै लज्जाजनक भएको स्थानीयहरुको गुनासो छ । मुख्यपर्व नजिकिदा स्थानीय सरकारका प्रतिनिधिले बजार अनुगमनवापतको भत्ता पचाउन मात्र अनुगमनको नाटक गर्छन् । वगनासकाली गाउँपालिकाको आर्य भज्याङ, रिब्दीकोट गाउँपालिकाको हार्थोक, रैनादेवी गाउँपालिकाको छहरा, पुर्वखोला गाउँपालिकाको पुर्वखोला, माथागढी गाउँपालिकाको सराइ, खहरे, झडेवा, रम्भा गाउँपालिकाको हुँगी, निस्दीको ढुंगाना वेसी र मित्याल, तिनाउ गाउँपालिकाको डुम्रे र दोभानमा म्याद समाप्त भएका पेय पदार्थ , खाने तेल, चाउचाउ, दालमोठ जस्ता सामानहरु बिक्री भएका छन् । यसपटक पनि सबैले बजारको अनुगमन गरेपनि त्यसको सकारात्मक प्रभाव नपरेको स्थानीयहरु बताउँछन् ।
तानसेन नगरका सूचना अधिकारी भरत आचार्य व्यापारीले मनोमानी गरे प्रचलित कानुनआनुरुप कारवाही गरिने बताउँछन् । जिल्लाको दोस्रो ठूलो व्यापारिक केन्द्र रामपुर बजारमा समेत मूल्यमा एकरुपता छैन । पसल अनुरुप दाल, चामल तरकारी जस्ता अन्य सामग्रीहरुको मूल्य फरक फरक भएको स्थानीय पार्वती गौतम बताउँछिन् ।
सरकारले जव पर्वहरु आउँछन् तव कालोबजारी, म्याद गएका सामानको बिक्री गर्ने जस्ता कार्यहरु गर्ने, कृत्रिम अभाव सिर्जना गर्ने, व्यापारी वा फर्मलाई तत्काल कानुनी कठघरामा ल्याउने भनिए पनि गरिव तथा विपन्न वर्गले दसै मनाउनै नसक्ने गरी व्यापारीले अस्वाभाविक रुपमा मूल्य वृद्धि गरेको स्थानीय प्रतिभा मल्ल बताउँछिन् ।
मुलुक बाढी पहिरोको कारण संकटमा परेको छ । नेपाल र नेपालीहरु शोकमा परेको वखतमा व्यापारीले मौकाको फाइदा उठाउन खोजेको खण्डमा व्यापारी वा व्यापारीक फर्मलाई स्थानीय प्रशासनलाई प्राप्त अधिकारको प्रयोग गरी कार्वाहीको दायरामा ल्याइने जिल्ला प्रशासन कार्यलयका प्रशासकीय अधिकृत रमा श्रेष्ठ बताउँछिन् ।
२१ चैत्र २०८१, बिहीबार
