खोज

बुटवल, १९ असोज ।

रोटरी क्लव अफ बुटवल चौतारीले क्लवको २२२ औं नियमित बैठकका अवसरमा योगा, ध्यान सहित विजयादशमीको शुभकामना कार्यक्रम गरेको छ ।

पथिक फाउण्डेशन योगाहल तिलोत्तमा–३ शंकरनगरमा आयोजित कार्यक्रममा क्लवका सदस्य रोटरीयनहरुलाई योगा तथा ध्यान गराइएको थियो । त्यस्तै सोही अवसरमा दसैंको शुभकामना आदानप्रदान कार्यक्रम समेत गरिएको थियो ।

कार्यक्रममा क्लवका निवर्तमान अध्यक्ष दिनेशमणि सुवेदी, पश्चिम नवलपरासीका जिल्ला न्यायाधीश हरि प्रसाद पंगेनी, क्लवका संस्थापक अध्यक्ष डा. विष्णुप्रसाद घिमिरेलगायतले शुभकामना मन्तव्य व्यक्त गरेका थिए ।

त्यस्तै कार्यक्रममा पथिक फाउण्डेशन रुपन्देहीका संयोजक माधव पौडेलले योगा तथा ध्यान, यसको महत्व, यसले मानिसको जीवनमा पार्ने सकारात्मक प्रभावबारे जानकारी गराएका थिए । स्वास्थ्यका लागि योग र ध्यान अपरिहार्य रहेको भन्दै पौडेलले अहिले सबैतिर यसको महत्व बढ्दै गएको र आम नागरिक योगा तथा ध्यानप्रति आकर्षित हुने गरेको बताए । पथिक फाउण्डेशनले शनिबार आफ्नै आर्थिक व्यवस्थापनमा रोटरीयनहरुलाई योग तथा ध्यानमा सहभागी गराएको हो ।

क्लवका अध्यक्ष नुमेन्द्र पौडेलले क्लवले बेलाबेलामा रचनात्मक कार्यक्रम गर्दै आइरहेको जानकारी गराउँदै व्यक्ति कुनै पनि काम गर्नका लागि पूर्णरुपमा स्वस्थ रहनुपर्छ भन्ने मान्यताका साथ शनिबार दसैं शुभकामनाका साथमा सम्पूर्ण रोटरीयनहरुलाई योगअभ्यास तथा ध्यान गराइएको बताए । उनले आगामी कात्तिक २४ गते हुने रक्तदान कार्यक्रममा रोटर्याक्ट क्लव अफ बुटवल चौतारीले पनि सहभागिता जनाउने बताए । रोटर्याक्ट क्लव अफ बुटवल चौतारीका अध्यक्ष गोविन्द पाण्डेले रक्तदान कार्यक्रममा आफ्नो क्लवले पनि सहकार्य गर्ने जानकारी गराएको पौडेलले बताए । त्यस्तै रोटर्याक्ट क्लव अफ भैरहवा चौतारीका अध्यक्ष आकाश पौडेल र इन्टर्याक्ट क्लव अफ बुटवल चौतारीका अध्यक्ष राहुल पाण्डेले पनि रक्तदानमा सहकार्य गर्ने भएका छन् । यी तिनैवटा क्लव रोटरी क्लव अफ बुटवल चौतारीका भातृ संस्था हुन् ।