खोज

बेलायत, अमेरिका लगायतका युरोपेली मुलकहरुमा ओमिक्रोनको सबभेरियन्ट एक्सइसीले संक्रमण, भर्ना र मृत्युदर बढाइरहेको भन्दै नेपाल सरकार स्वास्थ्य मन्त्रालयले कोरोनाबाट सावधानी अपनाउन आग्रह गर्दै खोप अभियान सुरु गरेको छ । सरकारले नेपालमा पनि कोरोना संक्रमणको जोखिम बढेकोले आवश्यक सतर्कता अपनाउन आग्रह गरेपछि एकपटक फेरी कोरोनाले संशयको अवस्था उत्पन्न गर्ने हो कि भन्ने चिन्ता थपिएको छ । नेपाल सरकार स्वास्थ्य मन्त्रालय अन्तर्गतको परिवार कल्याण महाशाखाले पछिल्ला दिनमा स्थानीय तहमा कोरोना विरुद्धको खोप अभियान सञ्चालन गरेर कोरोना परास्त गर्न सकिने आत्मविश्वास बढाउने काम गरेको छ, जुन अत्यन्त सकारात्मक छ । कोरोना जोखिम बढेकोले विभिन्न स्थानीय तहले खोप अभियान सञ्चालन गरेर नियन्त्रणको पूर्व तयारी गरेका छन् । कोरोनाबाट बच्ने सवैभन्दा सुरक्षित उपाय भनेको खोप नै भएकोले खोप लगाउने अभियानमा कोही पनि नछुटौं । सरकारले समेत अहिले सबै स्थानीय तहलाई खोपको आवश्यकता अनुसारको विवरण टिपाउन अनुरोध गरेको छ । अमेरिका र बेलायतमा फेला परेको नयाँ भेरिएन्टलाई चिकित्सकहरूले पुरानो भन्दा धेरै छिटो फैलिने भन्दै सतर्क रहन अनुरोध गरेका छन । युरोपेली मुलुकमा अहिले कोरोनाको दैनिक संक्रमणको दर बढिरहेको छ । स्वास्थ्य मन्त्रालयले औपचारिकरुपमा विज्ञप्ती नै निकालेर कोरोनाबाट स्वास्थ्य सावधानी अपनाउन आग्रह गरेको छ । अव आम जनता अझै सचेत बन्नु जरुरी छ ।

कोरोनाबाट बच्नका लागि हरेक नेपालीले मास्क अनिवार्य लगाउने बानी बसालियो भने त्यसले संक्रमण बढ्न नदिन ठूलो भूमिका खेल्न सक्छ । अव हरेक नेपालीले स्वास्थ्यका मापदण्ड पालनामा जोड दिनु जरूरी छ । फेरीपनि उही लापरवाही गरियो भने संक्रमण फेरी बढ्न सक्छ । त्यसकारण सचेतना जरुरी छ । अहिले आम नेपालीलाई मास्क लगाएर हिँड्न असजिलो लागेको छ । उता सरकार नियन्त्रणको औपचारिकतामा सीमित छ । सरकार एकातिर जनस्वास्थ्यका मापदण्डलाई हेलचेक्र्याइँ नगर्न जनतालाई आग्रह गर्छ, तर स्वयं भने त्यसको बेवास्ता गरिरहेको देखिएको छ । कोरोना संक्रमणले पद हेर्दैन र ओहदा चिन्दैन, जहाँ भीडभाड हुन्छ उहीं रमाउँछ ।

कोरोनाको नयाँ स्वरूपको भेरियन्टले स्वास्थ्य जोखिम बढाउन सक्ने भएकोले अव आम नेपाली जनता सतर्क र सजग हुनु आवश्यक छ । स्वास्थ्य मापदण्ड पालना गर्न सकियो भने कोरोना संक्रमण घटाउन सहयोग नै पुग्छ । अर्कोतर्फ भारतबाट आउनेहरूमा पनि स्वास्थ्य मापदण्ड पालना र चेकजाँच आवश्यक छ । विज्ञहरुले अझैपनि यस खालको भाइरसले निकै संक्रामक रूप देखाउने तथा सबै उमेर समूहलाई गम्भीर बिरामी बनाउन सक्ने सम्भावना कायमै रहेकोले अझै सचेत बन्नुपर्ने औंल्याइरहेका छन् । सरकारले अपनाउनुपर्ने सुरक्षा, जनशक्तिको व्यवस्थापन, उपचारका लागि आवश्यक अस्पताल, स्वास्थ्य केन्द्र, पीसीआर परीक्षण, आइसोलेसन लगायतका विषयमा अझैपनि सचेत हुनु जरुरी छ ।

जनशक्तिको थप व्यवस्थापन, औषधि, अक्सिजन, एम्बुलेन्सको व्यवस्थापन अझै राम्रो गर्नु आवश्यक छ । अव हाम्रो ध्यान खुला सिमाना, विदेशबाट आउने व्यक्तिहरुको निगरानी, परीक्षण, सचेतना अभिवृद्धि आदिमा जानु जरुरी छ । होइन भने फेरिपनि विगतको जस्तै अवस्था दोहोरियो भने त्यो दुर्भाग्य हुनेछ । नेपाल सरकार र सम्वन्धित निकायको ध्यान जाओस् । नेपालीहरुको महान चाड बडादशैं नजिक आएकोले अहिले विदेशबाट स्वदेश फर्किनेहरुको भीड नै लागेको छ । यो बेला विदेशबाट आउनेहरुबाट कोरोना संक्रमण फैलिनसक्ने चुनौति छ । तसर्थ अहिले सवै नेपाली जनताले स्वास्थ्य मापदण्ड पालना गर्नेतर्फ हेलचेक्राई गर्नु हुँदैन । सवै नेपालीले कोरोनाबाट बच्न सावधानी अपनाएको अवस्थामा संक्रमण आफै हराउन सक्ने भएकोले सतर्कता आवश्यक छ ।