खोज

सुर्खेत ।

कर्णालीमा रहेका स्थानीय तहका कर्मचारीहरुले आन्दोलन गर्ने चेतनावनी दिएका छन् । कर्णाली सरकारले विधेयक अनुमोदन गर्दा आफ्ना माग सम्बोधन नगरे कडा आन्दोलन गर्ने चेतावनी दिएका हुन् । कर्णाली प्रदेश अन्तर्गतका स्थानीय तहका राष्ट्रसेवक कर्मचारीहरुको गठन, संचालन तथा सेवाका शर्त सम्बन्धमा व्यवस्था गर्न बनेको विधेयक, २०८१ अनुमोदनको लागि हाल कर्णाली प्रदेश मामिला समितिमा छलफलका क्रममा रहेको छ ।

उक्त विधेयक अनुमोदनका लागि प्रदेश सभामा टेवुल हुने क्रममा छ । तसर्थ उक्त विधेयक अनुमोदन गर्दा स्थानीय तहमा कार्यरत राष्ट्रसेवक कर्मचारीको माग सम्बोधन गर्नुपर्ने दावी छ ।

स्थानीय सेवा कर्मचारी सञ्जाल नेपाल कर्णाली प्रदेश समितिका प्रदेश संयोजक विक्रम शाही र प्रदेश सचिव मान बहादुर बुढाथोकीद्धारा हस्ताक्षरित बिज्ञप्तिमा कर्मचारीको माग सम्बोधन नभए आफ्नो हक, अधिकार र सेवाको सुरक्षाको लागि कडा आन्दोलन गर्ने चेतावनी दिइएको छ ।

विधेयक अनुमोदन गर्दा २०७६ मा लोकसेवाबाट नियुक्ती लिएका छैटौं तहका कर्मचारीलाई सातौं तहमा बढुवा गर्नुपर्ने र निवृतिभरण उपदान कोष लागु गर्नुपर्ने, अन्तर प्रदेश सरुवालाई मान्यता दिनुपर्ने, पाँचौ तहबाट छैटौं तहमा बढुवा हुन ३ वर्ष अवधि कायम गर्नुपर्ने लगाएतका कर्मचारीले प्रमुख माग राखेका छन् ।

स्थानीय तहका कर्मचारीहरुको उत्प्रेरणा, मनोवल तथा वृति विकाससँग प्रत्यक्ष रुपमा जोडिएका मुख्य प्रावधान तथा स्थानीय सेवा कर्मचारी सञ्जाल नेपाल, कर्णाली प्रदेशले उठाएका माग तथा मुद्दाहरु पुरा गर्नुपर्ने विज्ञप्तीमा उल्लेख छ । ‘आफ्नो हक, अधिकार र सेवाको सुरक्षाको लागि कडा आन्दोलन गर्नुपर्ने देखिएको हुँदा तयारी अवस्थामा रहन कर्णाली प्रदेश अन्तर्गत सम्पुर्ण (७९वटै) स्थानीय तहमा कार्यरत राष्ट्रसेवक कर्मचारीहरुलाई हार्दिक अपिल गर्दछौँ ।’ विज्ञप्तीमा भनिएको छ ।